ലക്ഷദ്വീപിന്റെ മനോഹാരിത ആസ്വദിക്കുന്ന പ്രധാനമന്ത്രി നരേന്ദ്രമോദിയുടെ ചിത്രം പങ്കുവച്ച് പിന്തുണയുമായി നടി രചന നാരായണന്‍കുട്ടി. അടുത്ത യാത്ര എന്തുകൊണ്ട് ലക്ഷദ്വീപിലേക്ക് ആയിക്കൂടാ എന്ന ക്യാപ്ഷനോടെയാണ് ചിത്രം പങ്കുവച്ചിരിക്കുന്നത്. തന്റെ സുഹൃത്തുക്കളെ അടക്കം പങ്കുവച്ചാണ് രചനയുടെ പോസ്റ്റ്.
ലക്ഷദ്വീപ് സന്ദര്‍ശനത്തിന് ശേഷം പ്രധാനമന്ത്രി നരേന്ദ്ര മോദി സഞ്ചാരികളെ ലക്ഷദ്വീപിലേക്ക് ക്ഷണിച്ചിരുന്നു. ഇതിന് പിന്നാലെയാണ് രാജ്യത്തെയും പ്രധാനമന്ത്രിയെയും അധിക്ഷേപിച്ച് മാലദ്വീപ് മന്ത്രിമാര്‍ രംഗത്തെത്തിയത്. ഇതിന് പിന്നാലെയാണ് ലക്ഷദ്വീപ് ടൂറിസത്തെ പ്രോത്സാഹിപ്പിച്ച് സെലിബ്രിറ്റികള്‍ അടക്കം രംഗത്തെത്തുന്നത്.
സോഷ്യല്‍ മീഡിയയില്‍ മാലദ്വീപ് സര്‍ക്കാരിന്റെ നിലപാടിനെതിരായ പ്രതിഷേധം തുടരുകയാണ്. ബോയ്‌കോട്ട് മാലദ്വീപ്, എക്‌സ്‌പ്ലോര്‍ ഇന്ത്യന്‍ ഐലന്റ്‌സ് എന്നീ ഹാഷ്ടാഗുകള്‍ എക്സില്‍ തരംഗമാണ്. നിരവധി പേര്‍ മാലദ്വീപിലേക്കുളള യാത്രകള്‍ റദ്ദാക്കി. ഈ വിഷയത്തില്‍ പ്രതികരിച്ച് നടി ശ്വേത മോനോനും രംഗത്തെത്തിയിരുന്നു.
” ലോകത്തെ ഒന്നായി കാണാനാണ് ഇന്ത്യ പഠിപ്പിക്കുന്നത്. എന്റെ രാജ്യം വൈകാരികമായ ഇടമാണ്. ഒരു സൈനികന്റെ മകള്‍ എന്ന നിലയില്‍ ഞാന്‍ എന്റെ രാജ്യത്തെ ഓര്‍ത്ത് അഭിമാനം കൊള്ളുന്നുവെന്നും നിങ്ങള്‍ എത്രത്തോളം അപമാനിച്ചാലും ഞങ്ങളുടെ ടൂറിസം രംഗം ഉയരും.”
”ലക്ഷദ്വീപും ആന്‍ഡമാനും രാജ്യത്തെ മറ്റിടങ്ങളും കണ്ട് തീര്‍ത്തതിന് ശേഷം നമുക്ക് വിദേശ രാജ്യങ്ങള്‍ കാണാം. ഇന്ത്യയിലെ ദ്വീപുകള്‍ കാണാനും ആസ്വദിക്കാനും നമ്മുടെ പ്രദേശിക ടൂറിസത്തെ പ്രോത്സാഹിപ്പിക്കാനും അഭ്യര്‍ത്ഥിക്കുകയാണ്” എന്നാണ് ശ്വേത മേനോന്‍ കുറിച്ചത്.
