മോഹന്ലാല്-ലിജോ ജോസ് പെല്ലിശേരി കോംമ്പോയ്ക്കായി ഏറെ പ്രതീക്ഷയോടെയാണ് സിനിമാസ്വാദകര് കാത്തിരിക്കുന്നത്. മലയാള സിനിമ ഇതുവരെ കാണാത്ത വമ്പന് ഹൈപ്പ് ആണ് സിനിമയ്ക്ക് ലഭിച്ചിരിക്കുന്നത്. രാജസ്ഥാനില് ചിത്രീകരണം പുരോഗമിക്കുന്ന സിനിമയെ കുറിച്ച് പല അഭ്യൂഹങ്ങളും സോഷ്യല് മീഡിയയില് നടക്കുന്നുണ്ട്.
ഗുസ്തി ചാമ്പ്യനായ ദ് ഗ്രേറ്റ് ഗാമയായി മോഹന്ലാല് എത്തും എന്ന വാര്ത്തകള് ആയിരുന്നു ആദ്യം പ്രചരിച്ചിരുന്നത്. ഈ വാര്ത്തകളോട് ചിത്രത്തിന്റെ നിര്മ്മാതാക്കളില് ഒരാളായ ഷിബു ബേബി ജോണ് പ്രതികരിച്ചിരുന്നു. ആ വാര്ത്തകള് വ്യജമാണ് എന്നായിരുന്നു നിര്മ്മാതാവ് വ്യക്തമാക്കിയത്.
രാജസ്ഥാനിലെ ജയ് സാല്മീറിലും പൊഖ്റാന് കോട്ടയില് ചിത്രത്തിന്റെ ഷൂട്ടിംഗ് നടക്കുന്നതിന്റെ ചിത്രങ്ങള് നേരത്തെ പ്രചരിച്ചിരുന്നു. ചിത്രത്തിന്റെ സെറ്റില് നിന്നുള്ള മറ്റൊരു ചിത്രമാണ് ഇപ്പോള് ഏറെ ശ്രദ്ധ നേടുന്നത്. ലൊക്കേഷനില് നിന്നുള്ള ചിത്രങ്ങള് പുറത്തു പോകാതിരിക്കാന് മുന്കരുതല് എടുത്തിരിക്കുകയാണ് അണിയറ പ്രവര്ത്തകര്.
ഷൂട്ടിംഗുമായി ബന്ധപ്പെട്ടുള്ള ഒരു ചിത്രവും പുറത്തു പോകാതിരിക്കാന് ജൂനിയര് ആര്ട്ടിസ്റ്റുകളുടെ മൊബൈല് ഫോണുകള് ഷൂട്ടിംഗ് സമയത്ത് വാങ്ങി സൂക്ഷിക്കുന്ന ഒരു ഫോട്ടോയാണ് ഇപ്പോള് സോഷ്യല് മീഡിയയില് വൈറലാകുന്നത്. എന്നാല് ഫോട്ടോ സിനിമയുമായി ബന്ധപ്പെട്ട് ഔദ്യോഗികമായി പുറത്തുവന്നിട്ടുള്ളതല്ല.
നിരവധി സ്മാര്ട്ട് ഫോണുകള് നിരത്തി വച്ചിരിക്കുന്നതും അതിന് ഒരാള് കാവലിരിക്കുന്നതുമാണ് ഫോട്ടോയിലുള്ളത്. ”സെറ്റില് വച്ച് ജൂനിയര് ആര്ട്ടിസ്റ്റിന്റെ ഫോണ് തട്ടിയെടുത്ത സുരക്ഷാ ഉദ്യോഗസ്ഥന്, ഇപ്പോള് എല്ലാം തിരികെ നല്കാന് കാത്തിരിക്കുന്നു… സിനിമാ സെറ്റിലെ ജീവിതം” എന്ന ക്യാപ്ഷനോടെയാണ് ചിത്രം പ്രചരിക്കുന്നത്.
Read more
അതേസമയം, ചിത്രത്തിന്റെ അപ്ഡേഷനായി കാത്തിരിക്കുകയാണ് ആരാധകര്. രാധിക ആപ്തെയാണ് ചിത്രത്തില് നായികയാകുന്നത്. മറാഠി നടി സൊണാലി കുല്ക്കര്ണി, ഹരീഷ് പേരടി, ഹരി പ്രശാന്ത്, മണികണ്ഠന് ആചാരി എന്നിവരും ചിത്രത്തില് പ്രധാന കഥാപാത്രങ്ങളായി എത്തുന്നുണ്ട്.