കുമ്പളങ്ങി നൈറ്റ്‌സിലെ ബേബി മോളെ അവതരിപ്പിച്ച അന്ന ബെന്‍ ഇനി തികച്ചും വ്യത്യസ്തമായ ഒരു കഥാപാത്രത്തെ അവതരിപ്പിക്കും. വിനീത് ശ്രീനിവാസന്‍ നിര്‍മ്മിക്കുന്ന ഹെലന്‍ എന്ന ചിത്രത്തില്‍ ഒരു റെസ്റ്റോറന്റ് വെയ്ട്രസിന്റെ വേഷത്തിലാണ് നടി എത്തുക. ചിത്രത്തില്‍ അന്നയ്ക്ക് ടൈറ്റില്‍ വേഷമാണ്.
ചിത്രം സംവിധാനം ചെയ്യുന്നത് നവാഗതനായ മാത്തുക്കുട്ടി സേവ്യര്‍ ആണ്. ഹാബിറ്റ് ഓഫ് ലൈഫിന്റെ ബാനറില്‍ വിനീത് നിര്‍മ്മിക്കുന്ന രണ്ടാമത്തെ ചിത്രമാണ് “ഹെലെന്‍”. ഗണേഷ് രാജ് സംവിധാനം ചെയ്ത് 2016ല്‍ പുറത്തെത്തിയ “ആനന്ദ”മാണ് വിനീത് നിര്‍മ്മിച്ച ആദ്യത്തെ ചിത്രം.
അനൗണ്‍സ്മെന്റ് പോസ്റ്ററിനൊപ്പമാണ് ചിത്രം പ്രഖ്യാപിക്കപ്പെട്ടിരിക്കുന്നത്. “ദി ചിക്കന്‍ ഹബ്ബ്” എന്ന പേരിലുള്ള റസ്റ്റോറന്റിലെ വെയ്ട്രസ് ആണ് അന്നയുടെ കഥാപാത്രമെന്ന് പോസ്റ്റര്‍ സൂചന തരുന്നു. റെഡ് ടോപ്പും ക്യാപ്പുമടക്കം സ്ഥാപനത്തിന്റെ യൂണിഫോമിലാണ് പോസ്റ്ററില്‍ കഥാപാത്രം.
ലാല്‍ പോള്‍, അജു വര്‍ഗീസ്, റോണി ഡേവിഡ് രാജ് എന്നിവര്‍ക്കൊപ്പം ഒരുകൂട്ടം പുതുമുഖങ്ങളും മറ്റ് കഥാപാത്രങ്ങളെ അവതരിപ്പിക്കും.
