ദുൽഖർ സൽമാൻ നായകനാവുന്ന എറ്റവും പുതിയ ചിത്രം കാന്തയുടെ ടീസർ പുറത്തിറങ്ങി. സിനിമയുടെ 2.13 മിനിറ്റ് ദൈർഘ്യമുളള ടീസറാണ് ‌ദുൽഖറിന്റെ ജന്മദിനത്തിൽ അണിയറക്കാർ പുറത്തുവിട്ടിരിക്കുന്നത്. ഒരു സൂപ്പർസ്റ്റാറിനും സംവിധായകനും ഇടയിൽ നടക്കുന്ന വലിയ പ്രശ്നത്തിന്റെ കഥയാണ് സിനിമയുടെ ഇതിവൃത്തമെന്നാണ് ടീസർ നൽകുന്ന സൂചന. സെപ്റ്റംബർ 12നാണ് കാന്ത തിയേറ്ററുകളിലേക്ക് എത്തുന്നത്. തമിഴ് സിനിമയിലെ ആദ്യ സൂപ്പർസ്റ്റാറായി അറിയപ്പെടുന്ന എം കെ ത്യാഗരാജ ഭാഗവതരുടെ ജീവിതം ആസ്പദമാക്കിയുളള ചിത്രമാണ് കാന്ത.

സെൽവമണി സെൽവരാജ് ആണ് ഈ ചിത്രം എഴുതി സംവിധാനം ചെയ്യുന്നത്. ‘ദ ഹണ്ട് ഫോർ വീരപ്പൻ’ എന്ന നെറ്റ്ഫ്ലിക്സ് ഡോക്യുമെന്ററി സീരീസ് ഒരുക്കി ശ്രദ്ധ നേടിയ തമിഴ് സംവിധായകൻ ആണ് സെൽവമണി സെൽവരാജ്. 1950 കാലഘട്ടത്തിലെ മദ്രാസിന്റെ പശ്ചാത്തലത്തിലാണ് കാന്തയുടെ കഥ അവതരിപ്പിക്കുന്നത്. ദുൽഖർ സൽമാന്റെ ഉടമസ്ഥതയിലുള്ള വേഫേറർ ഫിലിംസ്, റാണ ദഗ്ഗുബതിയുടെ ഉടമസ്ഥതയിലുള്ള സ്പിരിറ്റ് മീഡിയ എന്നിവർ ചേർന്ന് ഈ ബഹുഭാഷാ ചിത്രം നിർമ്മിക്കുന്നു. ദുൽഖർ സൽമാൻ, ജോം വർഗീസ്, റാണ ദഗ്ഗുബതി, പ്രശാന്ത് പോട്ട്ലൂരി എന്നിവരാണ് ചിത്രത്തിന്റെ നിർമ്മാതാക്കൾ.

ഭാഗ്യശ്രീ ബോർസെ, സമുദ്രക്കനി, റാണ ദഗ്ഗുബതി തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. തമിഴിൽ ഒരുക്കിയ ഈ ചിത്രം മലയാളം, തെലുങ്ക്, ഹിന്ദി ഭാഷകളിലും റിലീസ് ചെയ്യും. ഛായാഗ്രഹണം- ഡാനി സാഞ്ചസ് ലോപ്പസ്, സംഗീതം- ഝാനു ചന്റർ, എഡിറ്റർ- ലെവെലിൻ ആന്റണി ഗോൺസാൽവേസ്, കലാസംവിധാനം- രാമലിംഗം, വസ്ത്രാലങ്കാരം- പൂജിത തടികൊണ്ട, സഞ്ജന ശ്രീനിവാസ്.