ബാലയ്യ ആരാധകർക്ക് പിറന്നാൾ സമ്മാനമായി ‘അഖണ്ഡ 2’ന്റെ ടീസർ. 2021ൽ പുറത്തിറങ്ങിയ അഖണ്ഡയുടെ രണ്ടാം ഭാഗമാണ് ചിത്രം. താണ്ഡവം എന്ന ടാഗ് ലൈനോടെയാണ് ചിത്രമെത്തുന്നത്. ടീസറിലെ ആക്ഷൻ രംഗങ്ങളും സംഗീതവും ആവേശം കൊള്ളിക്കുന്നതാണ്.

ആദ്യ ഭാഗം നേടിയ വിജയത്തിന് ശേഷം രണ്ടാം ഭാഗത്തിനായി ഏറെ ആകാംഷയോടെ കാത്തിരിക്കുകയായിരുന്നു ആരാധകർ. കേരളത്തിലും ചിത്രം ആരാധകരെ സ്വന്തമാക്കിയിരുന്നു. ബോയപ്പെട്ടി ശ്രീനു സംവിധാനം ചെയ്യുന്ന ചിത്രത്തിൽ മലയാളി താരം സംയുക്ത മേനോനും പ്രഗ്യ ജെയ്‌സ്വാളുമാണ് രണ്ടാം ഭാഗത്തിൽ നായികമാർ. ആദി പിനിഷെട്ടിയും ചിത്രത്തിൽ പ്രധാന വേഷത്തിലെത്തുന്നുണ്ട്.

മഹാ കുംഭമേളയിൽ വച്ചായിരുന്നു സിനിമയുടെ ചിത്രീകരണം ആരംഭിച്ചത്. എസ് തമൻ ആണ് ചിത്രത്തിന്റെ സംഗീതം ഒരുക്കിയിരിക്കുന്നത്‌. 14 റീൽസ് പ്ലസിന്റെ ബാനറിൽ രാം അചന്തയും ഗോപിനാഥ് അചന്തയുമാണ് ചിത്രം നിർമ്മിക്കുന്നത്. പ്രശസ്ത ആക്ഷൻ കൊറിയോഗ്രാഫർമാരായ രാം-ലക്ഷ്മണൻ ആണ് ചിത്രത്തിലെ സംഘട്ടന രംഗങ്ങൾ ഒരുക്കിയിരിക്കുന്നത്.

ദസറ റിലീസായാണ് ചിത്രം തീയേറ്ററുകളിലേക്ക് എത്തുന്നത്. ദസറയ്ക്ക് തെലുങ്ക് ബോക്‌സ് ഓഫീസിൽ ബാലയ്യയും പവൻ കല്യാണുമായിരിക്കും നേർക്കുനേർ എത്തുക.