കേരള സര്വകലാശാല കലോത്സവ വേദിയില് മന്ത്രി വി ശിവന്കുട്ടിയുടെ വിമര്ശനത്തോട് പ്രതികരിച്ച് നവ്യ നായര്. യുവജനോത്സവത്തില് അതിഥികളായി എത്തുന്ന സെലിബ്രിറ്റികള് വന്ന വഴി മറന്ന് വന് പ്രതിഫലം കൈപ്പറ്റുന്നത് അവസാനിപ്പിക്കണം എന്നായിരുന്നു മന്ത്രി പറഞ്ഞത്.
സംസ്ഥാന സ്കൂള് കലോത്സവത്തിന്റെ ഉദ്ഘാടനത്തിന് തന്റെ ക്ഷണം സ്വീകരിച്ചെത്തിയ നടന് മമ്മൂട്ടി പ്രതിഫലം വാങ്ങിയില്ലെന്നും സര്വകലാശാല കലോത്സവം സാമ്പത്തിക ബുദ്ധിമുട്ട് നേരിടുന്നുണ്ടെന്നും ഉദ്ഘാടന പ്രസംഗത്തില് ശിവന്കുട്ടി പറഞ്ഞു. ഈ വാക്കുകളോടാണ് വേദിയില് വച്ച് തന്നെ നവ്യ പ്രതികരിച്ചത്.
താന് ഒരു രൂപ പോലും വാങ്ങാതെയാണ് വന്നിരിക്കുന്നത് എന്നാണ് നവ്യ മറുപടി പറഞ്ഞത്. താന് വന്ന വഴി മറക്കില്ലെന്നും കലോത്സവത്തിന് എത്താന് പ്രതിഫലം വാങ്ങിയിട്ടില്ലെന്നും നവ്യ വ്യക്തമാക്കി. ഇതിനൊപ്പം ഇന്ന് കോളേജുകളില് നടക്കുന്ന കൊലപാതകങ്ങളെ അഡ്രസ് ചെയ്തും നവ്യ സംസാരിച്ചു.
ഇന്ന് കലാലയങ്ങളില് ഒരുപാടു ജീവനുകള് നഷ്ടമാകുന്നു. രക്ഷിതാക്കള് വലിയ പ്രതീക്ഷയോടെയാണ് വിദ്യാര്ഥികളെ കോളജുകളിലേക്ക് അയയ്ക്കുന്നത്. അക്കാദമിക് തലത്തില് വലിയ നേട്ടങ്ങള് സമ്പാദിച്ചില്ലെങ്കിലും ജീവനോടെ ഇരിക്കണം. സിനിമകളിലെ കൊലപാതക രംഗങ്ങള് വിദ്യാര്ഥികളെ മാനസികമായി സ്വാധീനിക്കും.
കഞ്ചാവ് ഉപയോഗിക്കുന്ന സിനിമാ ഡയലോഗുകള്ക്ക് ഇന്ന് വലിയ കയ്യടിയാണ് ലഭിക്കുന്നത്. അടിച്ചു പൊളിക്കേണ്ട കാലമാണ്. നല്ല മനുഷ്യരായി ജീവിക്കണമെന്നും നവ്യ വിദ്യാര്ഥികളോട് പറഞ്ഞു. ഇതിനൊപ്പം താന് വൈകാനുള്ള കാരണം കാരണം ഭാരവാഹികള് വൈകിയതിനാലാണെന്നും നവ്യ വ്യക്തമാക്കി.