“അയ്യങ്കാളി” എന്ന പേരില്‍ പ്രഖ്യാപിച്ച ചിത്രം അണിയറയില്‍ ഒരുങ്ങുന്നെന്ന് സംവിധായകന്‍ ആഷിഖ് അബു. ചിത്രത്തിന്റെ തിരക്കഥാ രചനയിലാണ് ശ്യാം പുഷ്‌കരനും സാംകുട്ടി പട്ടംകരിയുമെന്ന് ആഷിഖ് അബു പറഞ്ഞു. ഇന്ത്യന്‍ എക്‌സ്പ്രസുമായുള്ള അഭിമുഖത്തിലാണ് ആഷിഖ് അബു ഇക്കാര്യം പറഞ്ഞത്. കേരളത്തിലെ പിന്നോക്ക വിഭാഗങ്ങളുടെ ഉന്നമനത്തിനു വേണ്ടി പ്രവര്‍ത്തിച്ച സാമൂഹിക പരിഷ്‌കര്‍ത്താക്കളില്‍ ഒരാളായിരുന്നു അയ്യങ്കാളി.
വൈറസാണ് ആഷിഖ് അബുവിന്റെ റിലീസിംഗിന് ഒരുങ്ങുന്ന ഏറ്റവും പുതിയ ചിത്രം. കേരളത്തെ ഭയത്തിന്റെ മുള്‍മുനയില്‍ നിര്‍ത്തിയ നിപ കാലത്തിന്റെ കഥയാണ് ചിത്രം പറയുന്നത്. കുഞ്ചാക്കോ ബോബന്‍, ഫഹദ് ഫാസില്‍, രേവതി, ഇന്ദ്രജിത്ത്, ടൊവിനോ തോമസ്, റിമ കല്ലിങ്കല്‍, ആസിഫ് അലി, പാര്‍വതി, രമ്യ നമ്പീശന്‍, സൗബിന്‍ ഷാഹിര്‍, ദിലീഷ് പോത്തന്‍, ചെമ്പന്‍ വിനോദ് തുടങ്ങി വന്‍താരനിരയാണ് ചിത്രത്തില്‍ അണിനിരക്കുന്നുന്നത്.
Read more
ആഷിഖ് അബുവും ഭാര്യ റിമ കല്ലിങ്കലും ചേര്‍ന്നാണ് ചിത്രം നിര്‍മ്മിയ്ക്കുന്നത്. സുഡാനി ഫ്രം നൈജീരിയയുടെ തിരക്കഥയൊരുക്കിയ മുഹ്‌സിന്‍ പരാരിയും സുഹാസ് ഷറഫുമാണ് വൈറസിന്റെ തിരക്കഥയെഴുതിയത്. രാജീവ് രവിയാണ് ക്യാമറ. ജൂണ്‍ ഏഴിന് ചിത്രം തിയേറ്ററുകളിലെത്തും.
