നിങ്ങള്‍ക്ക് എന്തിനാ പൈസ തുടങ്ങിയ ചോദ്യങ്ങള്‍ ഉയരും, പക്ഷേ; തുറന്നുപറഞ്ഞ് പൂര്‍ണ്ണിമ ഇന്ദ്രജിത്ത്

നടി എന്നതിനപ്പുറം ഒരു സംരംഭക കൂടിയാണ് പൂര്‍ണ്ണിമ ഇന്ദ്രജിത്ത്. ഇപ്പോഴിതാ ഒരു സംരംഭക എന്ന നിലയില്‍ കേരളത്തില്‍ നിലനിന്നുപോകുന്നതിനെപ്പറ്റി മനസ്സുതുറന്നിരിക്കുകയാണ് അവര്‍. പ്രിവിലേജുകള്‍ തന്റെ യാത്രയെ എല്ലാ കാലത്തും എളുപ്പമാക്കില്ലെന്നാണ് ഓണ്‍ലൈന്‍ മീഡിയക്ക് നല്‍കിയ അഭിമുഖത്തില്‍ താരം പറഞ്ഞത്.

ഞാനെന്ത് പറഞ്ഞാലും അതൊരു പ്രിവിലേജിന്റെ പുറത്ത് ആണെന്നേ ആളുകള്‍ പറയൂ. സംരംഭക എന്നതിനേക്കാള്‍ സമൂഹത്തില്‍ സ്വന്തമായി ഒരു ഐഡന്റിറ്റി ഉണ്ടാക്കാന്‍ അല്ലെങ്കില്‍ വരുമാനമുണ്ടാക്കാന്‍ ആഗ്രഹിക്കുന്ന ഒരു സ്ത്രീ നേരിണ്ടേണ്ടി വരുന്ന പ്രശ്‌നങ്ങളാണ് ചര്‍ച്ച ചെയ്യേണ്ട വിഷയം. അങ്ങനെ നോക്കുമ്പോള്‍ ഒരു പക്ഷെ എനിക്ക് പ്രിവിലേജുകളുണ്ട്. ആ പ്രിവിലേജുകള്‍ ഒരു പരിധി വരെ ഗുണവുമാണ്.

എല്ലാം എളുപ്പമാണല്ലോ, നിങ്ങള്‍ക്ക് എന്തിനാ പൈസ തുടങ്ങിയ ചോദ്യങ്ങളും വരാറുണ്ട്. ഈ കാര്യങ്ങള്‍ എന്റെ കൂടെ വര്‍ക്ക് ചെയ്യുന്നവരോട് എനിക്ക് അങ്ങനെ പറയാന്‍ പറ്റത്തില്ലല്ലോ. എല്ലാവര്‍ക്കും അവരവരുടെ ജീവിതത്തില്‍ അവരുടേതായ പോസിറ്റീവ് ആയ കാര്യങ്ങളുണ്ട്. അതേപോലെ തന്നെ ബുദ്ധിമുട്ടുകളുമുണ്ടാകും. ഇതെല്ലാം ഒന്നിച്ച ്മാനേജ് ചെയ്ത് പോവുക എന്നതിലാണ് പ്രശ്‌നമെന്ന് അവര്‍ വ്യക്തമാക്കി.

രാജീവ് രവി സംവിധാനം ചെയ്യുന്ന തുറമുഖമാണ് പൂര്‍ണിമയുടേതായി ഇനി പുറത്തിറങ്ങാനുള്ള ചിത്രം. ഈ മാസം പത്താം തീയതിയാണ് ചിത്രം തിയേറ്ററുകളില്‍ എത്തുന്നത്. ജോജു ജോര്‍ജ്, ഇന്ദ്രജിത്ത് സുകുമാരന്‍, നിമിഷ സജയന്‍, അര്‍ജുന്‍ അശോകന്‍, ദര്‍ശന രാജേന്ദ്രന്‍, സുദേവ് നായര്‍, മണികണ്ഠന്‍ ആചാരി, സെന്തില്‍ കൃഷ്ണ, സന്തോഷ് കീഴാറ്റൂര്‍ തുടങ്ങി വന്‍താരനിരയാണ് ചിത്രത്തിലുള്ളത്.