വെട്രിമാരന്റെ ‘വിടുതലൈ’ പ്രേക്ഷകര്‍ ഏറ്റെടുത്തിരിക്കുകയാണ്. ഇതിനിടെ സംവിധായകന്‍ തന്റെ ഹിറ്റ് സിനിമ ‘വട ചെന്നൈ’യെ കുറിച്ച് പറഞ്ഞ വാക്കുകളാണ് ശ്രദ്ധ നേടുന്നത്. വട ചെന്നൈയില്‍ അഭിനയിക്കാന്‍ അല്ലു അര്‍ജുനെ സമീപിച്ചിരുന്നു എന്ന് വെളിപ്പെടുത്തുകയിരിക്കുകയാണ് സംവിധായകന്‍.
അല്ലു അര്‍ജുനെ വെച്ചൊരു സിനിമ ചെയ്യാന്‍ ഏറെ ആഗ്രഹിച്ചിരുന്നു. തിരക്കഥ അദ്ദേഹത്തിനോട് പറയുകയും ചെയ്തിരുന്നു. എന്നാല്‍ ചില കാരണങ്ങള്‍ കൊണ്ട് പ്രോജക്ട് നടന്നില്ല. ധനുഷ് പ്രധാന വേഷത്തിലെത്തിയ വട ചെന്നൈയില്‍ അല്ലു അര്‍ജുനെ ഒരു സുപ്രധാന കഥാപാത്രം അവതരിപ്പിക്കാന്‍ സമീപിച്ചിരുന്നതാണ്.
അദ്ദേഹം തമിഴില്‍ അഭിനയിക്കാന്‍ ആഗ്രഹം പ്രകടിപ്പിക്കുകയും ചെയ്തിരുന്നു. എന്നാല്‍ അന്ന് മനസിലുണ്ടായിരുന്ന ചിത്രമല്ല ഇപ്പോള്‍ നിങ്ങള്‍ കണ്ട സിനിമ. കഥയില്‍ ചില മാറ്റങ്ങള്‍ വരുത്തിയിരുന്നു എന്നാണ് വെട്രിമാരന്‍ പറയുന്നത്. ഹൈദരാബാദില്‍ നടന്ന ഒരു പ്രസ് മീറ്റിലാണ് വെട്രിമാരന്‍ സംസാരിച്ചത്.
അതേസമയം, മാര്‍ച്ച് 31ന് റിലീസ് ചെയ്ത വിടുതലൈ ഗംഭീര കളക്ഷന്‍ ആണ് നേടിയിരിക്കുന്നത്. അടിച്ചമര്‍ത്തപ്പെടുന്നവരുടെ കഥയാണ് വിടുതലൈ. ചിത്രത്തിന്റെ ആമുഖം മാത്രമാണ് ആദ്യഭാഗം പറഞ്ഞുവെക്കുന്നത്.
Read more
സൂരി അഭിനയിച്ച കുമരേശന്‍ എന്ന കഥാപാത്രത്തിലൂടെ വിജയ് സേതുപതിയുടെ പെരുമാളിന്റെയും നാടിന്റെയും കഥ പൂര്‍ണമായും രണ്ടാം ഭാഗത്തിലൂടെയാണ് കാണിക്കുക. 15 വര്‍ഷമായി മനസില്‍ കൊണ്ടു നടക്കുന്ന സ്വപ്ന പദ്ധതി 40 കോടി ബജറ്റിലാണ് വെട്രിമാരന്‍ ഒരുക്കിയത്.
