സൈന്യം ചിത്രത്തിന്റെ സെറ്റില് നിന്നുള്ള ഓര്മ്മകള് പങ്കുവെച്ച് മുകേഷ്. അഭിനയത്തിന് പുറമേ മമ്മൂട്ടി സ്വായത്തമാക്കിയിട്ടുള്ള ചില സാങ്കേതികതകളെ കുറിച്ചും അത് ചില അവസരങ്ങളില് ഉപയോഗപ്പെട്ടതിനെ കുറിച്ചുമാണ് ‘മമ്മൂക്ക സകലകലാ വല്ലഭന്’ എന്ന് പേരിട്ട വീഡിയോയില് മുകേഷ് വ്യക്തമാക്കിയിരിക്കുന്നത്. പ്രിയാരാമന് പൊള്ളലേല്ക്കുന്ന തരത്തിലുള്ള മേക്കപ്പ് ചെയ്തതിനെ കുറിച്ചും നടിയെ പറ്റിച്ചതിനെ കുറിച്ചുമാണ് മുകേഷ് പറയുന്നത്.
മുകേഷിന്റെ വാക്കുകള്:
സൈന്യത്തില് ഒരു അപകടത്തില് പ്രിയയ്ക്ക് പൊള്ളലേല്ക്കുന്ന രംഗമുണ്ട്. സിനിമയില് മൂന്ന് മേക്കപ്പ്മാന്മാര് ഉണ്ടായിരുന്നു. അവരെ വിളിച്ച് സംവിധായകന് ജോഷി പൊള്ളല് എങ്ങനെയാണ് മേക്കപ്പ് ചെയ്യുന്നതെന്ന് കാണിക്കൂ എന്ന് പറഞ്ഞു. നിങ്ങള് നിങ്ങളുടെ കൈയില് ഇട്ടിട്ട് വന്ന് കാണിച്ചാല് മതിയെന്ന് പറഞ്ഞു. ഹൈദരാബാദിലെ സെറ്റില് പിന്നെ ഒരു മേക്കപ്പ് മത്സരമാണ് നടന്നത്.
ഒന്നാമത്തെയാള് മേക്കപ്പുമായെത്തി. അത് കണ്ട് ജോഷിയേട്ടന് പറഞ്ഞു. പ്രിയയ്ക്ക് കുഷ്ഠമല്ല പൊള്ളലാണ് ഏറ്റതെന്ന്. കൊണ്ടു പോടായെന്ന് അയാളോട് പറഞ്ഞു. അടുത്തയാള് മേക്കപ്പുമായി വന്നു. വരട്ടുചൊറി അല്ലെങ്കില് കരപ്പന്, എടാ പൊള്ളലാണ്, എടുത്തു കള, അതുകണ്ട് ജോഷിയേട്ടന് പറഞ്ഞത് അങ്ങനെയായിരുന്നു. മൂന്നാമത്തെ മേക്കപ്പ്മാന് മത്സരത്തില് നിന്ന് പിന്മാറി.
ഇനി എന്ത് ചെയ്യാനാണ് എന്ന് പറഞ്ഞിരിക്കുമ്പോഴാണ് മമ്മൂക്ക വന്നത്. അദ്ദേഹം അദ്ദേഹത്തിന്റെ മേക്കപ്പ്മാനായ ജോര്ജ്ജിനെ വിളിച്ച് നമുക്കൊന്നും മനസ്സിലാകാത്ത സാങ്കേതിക കാര്യങ്ങള് പറഞ്ഞു. ജോര്ജ്ജ് പ്രിയാരാമന് മേക്കപ്പിട്ടു. അത് കണ്ട് ജോഷിയേട്ടന് പറഞ്ഞത് ഫന്റാസ്റ്റിക് എന്നാണ്, ഇതാണ് പൊള്ളല്. മൂന്ന് മേക്കപ്പ്മാന്മാര് കിണഞ്ഞു പരിശ്രമിച്ചിട്ടും ചെയ്യാന് പറ്റാത്ത ഒരു മേക്കപ്പാണ് മമ്മൂക്കയും ജോര്ജ്ജും കൂടി ആ സമയത്ത് പ്രിയാ രാമനു വേണ്ടി ചെയ്തത്.
സീന് ഷൂട്ട് ചെയ്ത് കഴിഞ്ഞപ്പോള് പ്രിയാരാമന് പറഞ്ഞത് താന് ശരിക്കും അത്ഭുതപ്പെട്ടു പോയി എന്നാണ്. മമ്മൂട്ടി സാര് ഇങ്ങനെയൊക്കെ ചെയ്യുമോ എന്നും. മമ്മൂക്ക കാറില് ഇരിക്കുകയാണെന്ന് ഉറപ്പു വരുത്തി ഞാന് അപ്പോള് ഒരു കോമഡി പറഞ്ഞു. മമ്മൂക്ക പണ്ട് ശാരദാമ്മയുടെ മേക്കപ്പ്മാന് ആയിരുന്നില്ലേ എന്നാണ് തട്ടിവിട്ടത്. ഇതു കൂടി കേട്ടതോടെ പ്രിയാ രാമന് ഞെട്ടിത്തരിച്ചു, ആണോ അങ്ങനെ ഒരു സംഭവം എനിക്ക് അറിയില്ലായിരുന്നു. അത് പറഞ്ഞ് ഞങ്ങള് പൊട്ടിച്ചിരിച്ചു കൊണ്ടിരുന്നപ്പോഴാണ് പെട്ടെന്ന് മമ്മൂക്ക ഇറങ്ങിവന്നത്.
Read more
എന്താ ഇവിടെ ഒരു ചിരിയെന്ന് ചോദിച്ചു, അപ്പോള് പ്രിയ പറഞ്ഞു ഇവര് മമ്മൂക്കയേ പുകഴ്ത്തുകയായിരുന്നുവെന്ന് പറഞ്ഞ് ഞാന് പറഞ്ഞ കാര്യം പറഞ്ഞു. ഇത് കേട്ട് അദ്ദേഹം അടുത്തുവന്ന് കൈപിടിച്ചിട്ട് പറഞ്ഞു, എവിടുന്ന് കിട്ടുന്നെടേയ് ഈ റെയര് കഥകളൊക്കെ, എന്നിട്ട് മതിമറന്നൊരു ചിരി ചിരിച്ചു. ഞങ്ങളും ചിരിച്ചു, പ്രിയ ഒഴികെ, ഇന്നും പ്രിയാരാമന് സംഭവം എന്താണെന്ന് മനസിലായിട്ടില്ല.
