താന്‍ അഭിനയിച്ച സിനിമകള്‍ വീണ്ടും കാണാറില്ലെന്ന് ദുല്‍ഖര്‍ സല്‍മാന്‍. എന്നാല്‍ വാപ്പച്ചി അങ്ങനെയല്ല, ഇടയ്ക്ക് 80കളില്‍ അഭിനയിച്ച സിനിമകള്‍ എടുത്ത് കാണാറുണ്ട് എന്നാണ് ദുല്‍ഖര്‍ പറയുന്നത്. ‘കിംഗ് ഓഫ് കൊത്ത’യുടെ പ്രമോഷന്റെ ഭാഗമായി മുംബൈയിലാണ് ദുല്‍ഖര്‍ സംസാരിച്ചത്.
”എന്റെ സിനിമകള്‍ വീണ്ടും കാണാന്‍ ആഗ്രഹിക്കാറില്ല. ഒട്ടുമിക്ക അഭിനേതാക്കളും അങ്ങനെയാണെന്നാണ് തോന്നുന്നത്. കുറച്ചു കൂടി നന്നായി ചെയ്യാമായിരുന്നല്ലോ, വ്യത്യസ്തമാക്കാമായിരുന്നല്ലോ എന്നൊക്കെ തോന്നും. ഷൂട്ടിന്റെ സമയത്ത് ചിലപ്പോള്‍ ഡയറക്ടേഴ്സ് നിര്‍ദേശങ്ങള്‍ നല്‍കും.”
”ഞങ്ങള്‍ ചില ഇമ്പ്രൊവൈസേഷന്‍സ് ചെയ്യും. അത് കഴിഞ്ഞ് തിരികെ എത്തുമ്പോഴായിരിക്കും ഇത് ഇങ്ങനെ ചെയ്യാമായിരുന്നല്ലോ എന്ന ചിന്ത വരുന്നത്. സ്വന്തം സിനിമ കാണുന്നത് വാപ്പച്ചി ഇഷ്ടപ്പെടുന്നുണ്ടോ എന്ന് എനിക്ക് അറിയില്ല. പക്ഷേ യൂട്യൂബില്‍ 80കളിലെ അദ്ദേഹത്തിന്റെ സിനിമകള്‍ ഇരുന്ന് കാണുന്നത് കണ്ടിട്ടുണ്ട്.”
”ചിലപ്പോള്‍ ഞാന്‍ റൂമിലേക്ക് കേറി ചെല്ലുമ്പോള്‍ പഴയ സിനിമകള്‍ കാണുന്നുണ്ടാവും. അന്നത്തെ ഓര്‍മകളൊക്കെ അയവിറക്കുന്നതാവാം. ഇന്നാണെങ്കില്‍ ഞാന്‍ ഈ കഥാപാത്രത്തെ അങ്ങനെ ചെയ്തേക്കില്ല എന്ന് വാപ്പച്ചി പറയും. അങ്ങനെ ചെയ്യുന്നത് നല്ല കാര്യമാണ്. എനിക്കും അതുപോലെ എന്റെ സിനിമകള്‍ കാണണം” എന്നാണ് ദുല്‍ഖര്‍ പറയുന്നത്.
Read more
അതേസമയം, ഓഗസ്റ്റ് 24ന് ആണ് കിംഗ് ഓഫ് കൊത്ത റിലീസ് ചെയ്യുന്നത്. അഭിലാഷ് ജോഷി സംവിധാനം ചെയ്യുന്ന ചിത്രം ദുല്‍ഖറിന്റെ കരിയറിലെ ഏറ്റവും വലിയ ബജറ്റിലാണ് ഒരുങ്ങുന്നത്. ഐശ്വര്യ ലക്ഷ്മിയാണ് ചിത്രത്തില്‍ നായിക. ചിത്രത്തിന്റെതായി പുറത്തിറങ്ങിയ ട്രെയ്‌ലറും ഗാനങ്ങളുമെല്ലാം ശ്രദ്ധ നേടിയിരുന്നു.
