തെലുങ്കില്‍ അഭിനയിക്കാന്‍ പോയപ്പോഴുണ്ടായ രസകരമായ അനുഭവം പങ്കുവച്ച് നടി ചന്ദ്ര ലക്ഷ്മണ്‍. ആദ്യമായാണ് തെലുങ്കില്‍ അഭിനയിക്കാന്‍ പോയത്. എന്നാല്‍ തന്നെ കണ്ട് നിറയെ ആളുകള്‍ കൂടി. അവിടെ തനിക്ക് ഇത്രയധികം ആരാധകര്‍ എങ്ങനെ ഉണ്ടായെന്ന് ആലോചിച്ച് അത്ഭുതപ്പെട്ടു. എന്നാല്‍ താന്‍ മരിച്ചു പോയ നടി സൗന്ദര്യ ആണെന്ന് കരുതിയാണ് ആളുകള്‍ വന്നത് എന്നാണ് ചന്ദ്ര പറയുന്നത്.
മമതല കോവില എന്ന പരമ്പരയായിരുന്നു തെലുങ്കില്‍ ആദ്യമായി ചെയ്തത്. അതിന്റെ പ്രൊമോ സോംഗ് ഷൂട്ടിനിടെയൊരു ഒരു സംഭവമുണ്ടായി. പോച്ചമ്പള്ളി എന്ന ഗ്രാമത്തിലാണ് ഷൂട്ട് ചെയ്യുന്നത്. ഷൂട്ട് ചെയ്യുന്ന സമയത്ത് എല്ലാവരും തന്നെ വന്നു നോക്കുന്നു. ഭയങ്കര ഫാന്‍ ഫോളോയിംഗ്. തനിക്ക് അത്ഭുതമായി. താന്‍ മുമ്പ് തെലുങ്ക് ചെയ്തിട്ടില്ല.
ഇതുപോലൊരു ഗ്രാമത്തില്‍ എങ്ങനെ തന്നെ മനസിലാകുന്നുവെന്ന് ചിന്തിച്ചു. സീരിയല്‍ തുടങ്ങിയിട്ടില്ല. ടൈറ്റില്‍ സോംഗ് ഷൂട്ട് നടക്കുന്നേയുള്ളൂ. താന്‍ രണ്ട് മൂന്ന് തമിഴ് പ്രൊജക്ടുകളില്‍ വര്‍ക്ക് ചെയ്തിരുന്നു. അത് തെലുങ്കില്‍ ഡബ്ബ് ചെയ്ത് ജെമിനിയില്‍ സംപ്രേക്ഷണം ചെയ്തിട്ടുണ്ട്. അത് കണ്ടിട്ടാകും ഫാന്‍സ് വരുന്നതെന്ന് കരുതി.
ആളുകള്‍ കൂടിക്കൊണ്ടിരിക്കുകയാണ്. മുടിയൊക്കെ പിന്നിയിട്ട്, പൊട്ടൊക്കെ തൊട്ട് ടിപ്പിക്കല്‍ ആന്ധ്ര ലുക്കിലാണ് താന്‍ നില്‍ക്കുന്നത്. സത്യത്തില്‍ കുറേ പേര്‍ കരുതിയിരുന്നത് താന്‍ നടി സൗന്ദര്യ ആണെന്നായിരുന്നു. നേരത്തെ തന്നെ പലരും പറയുമായിരുന്നു സൗന്ദര്യയെ പോലെയുണ്ടെന്ന്. അവര്‍ കരുതിയത് താന്‍ സൗന്ദര്യയാണ് എന്നായിരുന്നു.
Read more
പക്ഷെ ആ സമയത്ത് സൗന്ദര്യ മരിച്ചു പോയിരുന്നു. എന്നാല്‍ അത് തിരിച്ചറിയാതെ സൗന്ദര്യ വന്ന് അഭിനയിക്കുകയാണെന്ന് കരുതിയാണ് അവര്‍ തന്റെയടുത്ത് വന്നതും സംസാരിച്ചതും. സൗന്ദര്യ ഗാരു, സൗന്ദര്യ ഗാരു എന്നായിരുന്നു വിളിച്ചിരുന്നത് എന്നാണ് ചന്ദ്ര ഒരു ഷോയില്‍ പറയുന്നത്.
