അക്ഷയ് കുമാര്‍-ടൈഗര്‍ ഷ്രോഫ് ചിത്രത്തില്‍ കൊടൂര വില്ലനായി പൃഥ്വിരാജ്. ‘ബഡേ മിയാന്‍ ഛോട്ടെ മിയാന്‍’ എന്ന ചിത്രത്തിന്റെ ടീസര്‍ ആണിപ്പോള്‍ പുറത്തെത്തിയിരിക്കുന്നത്. ‘പ്രളയം സര്‍വ്വ നാശം വിതയ്ക്കുന്ന പ്രളയം’, എന്ന പൃഥ്വിരാജിന്റെ സംഭാഷണങ്ങളോടെയാണ് ടീസര്‍ ആരംഭിക്കുന്നത്. എന്നാല്‍ പൃഥ്വിരാജിന്റെ ലുക്ക് ടീസറില്‍ വ്യക്തമാക്കുന്നില്ല.
ഇന്ത്യന്‍ സൈനികരായാണ് അക്ഷയ് കുമാറും ടൈഗര്‍ ഷ്രോഫും വേഷമിടുന്നത്. ഇരുവരുടെ വന്‍ ആക്ഷന്‍ രംഗങ്ങള്‍ ടീസറില്‍ ഉള്‍പ്പെടുത്തിയിട്ടുണ്ട്. ആക്ഷന്‍ ത്രില്ലര്‍ ആയി എത്തുന്ന ചിത്രം അലി അബ്ബാസ് സഫര്‍ ആണ് സംവിധാനം ചെയ്യുന്നത്. മാനുഷി ചില്ലര്‍, സൊനാക്ഷി സിന്‍ഹ, അലയ എഫ് എന്നീ താരങ്ങളും ചിത്രത്തില്‍ വേഷമിടുന്നുണ്ട്.
നിലവില്‍ ജോര്‍ദ്ദാനില്‍ ചിത്രത്തിന്റെ ഷൂട്ടിംഗ് നടക്കുന്നുണ്ട്. ഏപ്രിലില്‍ ഈദ് റിലീസ് ആയാണ് ചിത്രം എത്തുക. പൂജ എന്റര്‍ടെയ്‌മെന്റും ആസ് ഫിലിംസും ചേര്‍ന്നാണ് സിനിമ നിര്‍മ്മിക്കുന്നത്. സ്‌കോട്ട്‌ലാന്‍ഡ്, ലണ്ടന്‍, യുഎഇ എന്നിവിടങ്ങളിലും ചിത്രത്തിന്റെ ഷൂട്ടിംഗ് നടന്നിരുന്നു.
അതേസമയം, പൃഥ്വിരാജിന്റെ മൂന്നാം ബോളിവുഡ് അങ്കമാണ് ‘ബഡേമിയാന്‍ ഛോട്ടേ മിയാന്‍’. ‘അയ്യ’ എന്ന സിനിമയിലൂടെ 2012ല്‍ ആണ് പൃഥ്വിരാജ് ബോളിവുഡിലേക്ക് അരങ്ങേറ്റം കുറിച്ചത്. എന്നാല്‍ അയ്യ പൃഥ്വിരാജിന്റെ കരിയറില്‍ വലിയ മാറ്റങ്ങളൊന്നും കൊണ്ടു വന്നില്ല. ചിത്രം പരാജയമായിരുന്നു.
Read more
2017ല്‍ എത്തിയ ‘നാം ശബ്ന’ എന്ന സിനിമയിലൂടെയാണ് പൃഥ്വിരാജ് വീണ്ടും ബോളിവുഡില്‍ മുഖം കാണിച്ചത്. എന്നാല്‍ ഈ സിനിമയിലൂടെയും താരത്തിന് ബോളിവുഡില്‍ തിളങ്ങാനായില്ല. അതുകൊണ്ട് തന്നെ തന്റെ മൂന്നാമത്തെ ബോളിവുഡ് സിനിമയ്ക്കായി പ്രതീക്ഷയോടെയാണ് താരം ഒരുങ്ങിയിരിക്കുന്നത്.
