‘ഗോന്ധൽ’ ഓസ്കറിലേക്ക്; 33 ഇന്ത്യൻ ചിത്രങ്ങളെ മറികടന്ന് മറാഠി ചിത്രം ഇന്ത്യയുടെ ഔദ്യോഗിക എൻട്രിയായി

2027ലെ ഓസ്കർ പുരസ്കാരത്തിനുള്ള ഇന്ത്യയുടെ ഔദ്യോഗിക എൻട്രിയായി മറാഠി ചിത്രം ‘ഗോന്ധൽ’ തിരഞ്ഞെടുക്കപ്പെട്ടു. ഫിലിം ഫെഡറേഷൻ ഓഫ് ഇന്ത്യയാണ് പ്രഖ്യാപനം നടത്തിയത്. 99-ാമത് അക്കാദമി അവാർഡ്സിലെ മികച്ച അന്തർദേശീയ ഫീച്ചർ ചിത്രത്തിനുള്ള വിഭാഗത്തിലാണ് ചിത്രം ഇന്ത്യയെ പ്രതിനിധീകരിക്കുക.

സന്തോഷ് ദവഖാർ രചനയും സംവിധാനവും നിർവഹിച്ച ‘ഗോന്ധൽ’ ഗ്രാമീണ മഹാരാഷ്ട്രയുടെ പശ്ചാത്തലത്തിൽ ഒരുക്കിയ ചിത്രമാണ്. നവദമ്പതികൾക്കായി രാത്രിയിൽ നടക്കുന്ന പരമ്പരാഗത ആചാരത്തെ ചുറ്റിപ്പറ്റിയാണ് കഥ. 33 ചിത്രങ്ങളിൽ നിന്നാണ് ‘ഗോന്ധൽ’ തിരഞ്ഞെടുക്കപ്പെട്ടതെന്ന് സെലക്ഷൻ കമ്മിറ്റി ചെയർപേഴ്സൺ പി. ശേഷാദ്രി അറിയിച്ചു. ‘അംഖ്’, ‘ഇക്കിസ്’ എന്നിവയായിരുന്നു അവസാനഘട്ടത്തിലെ മറ്റ് ചിത്രങ്ങൾ.

2025ലെ 56-ാമത് ഇന്ത്യയുടെ അന്താരാഷ്ട്ര ചലച്ചിത്രമേളയിൽ ഇന്ത്യൻ പനോരമ വിഭാഗത്തിൽ വേൾഡ് പ്രീമിയർ ചെയ്ത ചിത്രത്തിന് സന്തോഷ് ദവഖാറിന് മികച്ച സംവിധായകനുള്ള രജത മയൂരം ലഭിച്ചിരുന്നു. ഇഷിത ദേശ്മുഖാണ് ചിത്രത്തിലെ കേന്ദ്ര കഥാപാത്രമായ സുമനെ അവതരിപ്പിക്കുന്നത്. ഇളയരാജയാണ് സംഗീതം ഒരുക്കിയത്.