ഇരുകൈകളുമില്ലാതെ കാലുകള്‍ ഉപയോഗിച്ച് പത്താംക്ലാസ് പരീക്ഷ എഴുതിയ ദേവിക എന്ന മിടുക്കി മുഴുവന്‍ വിഷയങ്ങള്‍ക്കും എ പ്ലസ് നേടി താരമായിരിക്കുകയാണ്. സഹായിയെ വെച്ച് പരീക്ഷയെഴുതാന്‍ അവസരമുണ്ടായിട്ടും ഒരു പരീക്ഷയ്ക്കു പോലും ദേവിക ആരുടെ സഹായവും കൂടാതെ തന്റെ കരുത്തുറ്റ കാലുകള്‍ കൊണ്ട് പരീക്ഷയെഴുതിയാണ് വിജയം സ്വന്തമാക്കിയത്.
കോഴിക്കോട് വള്ളിക്കുന്ന് സി.ബി.എച്ച്.എസ് സ്‌കൂളിലെ വിദ്യാര്‍ത്ഥിനിയാണ് ദേവിക. എസ്എസ്എല്‍സിയില്‍ രണ്ട് പരീക്ഷയില്‍ മാത്രം അനുവദനീയമായ അധിക സമയം ഉപയോഗിച്ചതല്ലാതെ മറ്റെല്ലാ പരീക്ഷകളും മറ്റുള്ളവര്‍ക്ക് ഒപ്പം എഴുതി തീര്‍ത്താണ് ഈ മിടുക്കി എ പ്ലസ് കരസ്ഥമാക്കിയത്.
ജന്മനാ തന്നെ ഇരുകൈകളുമില്ലാതിരുന്ന ദേവികയെ മാതാപിതാക്കളാണ് കാലുകള്‍ കൊണ്ട് എഴുതാന്‍ പഠിപ്പിച്ചത്. തന്റെ വൈകല്യത്തിന്റെ പേരില്‍ ഒരു സൗജന്യവും ഒരിക്കല്‍ പോലും ദേവിക വാങ്ങിയിരുന്നില്ല. പഠിച്ച സ്‌കൂളുകളിലെ എല്ലാ അധ്യാപകരും ദേവികയുടെ വിജയത്തിനായി ഒപ്പം നിന്നു. അതിലുപരി മാതാപിതാക്കളുടെ അളവറ്റ സ്‌നേഹവും പ്രോത്സാഹനവും ദേവികയുടെ കഠിനാധ്വാനവും ഈ വിജയത്തിന് മാറ്റു കൂട്ടി.
Read more
പഠനത്തില്‍ മാത്രമല്ല കലയിലും പാട്ടിലും ഒന്നാം സ്ഥാനക്കാരിയാണ് ദേവിക. ചിത്രം വരച്ചും പാട്ടു പാടിയും ദേവിക നിരവധി പുരസ്‌കാരങ്ങള്‍ നേടിയിട്ടുണ്ട്. ഇനി പ്ലസ് വണിന് ഹ്യുമാനിറ്റീസ് എടുത്ത് ഇവിടെ തന്നെ പഠിക്കാനാണ് ദേവികയുടെ തീരുമാനം. ഭാവിയില്‍ സിവില്‍ സര്‍വീസ് നേടണമെന്നാണ് ഈ മിടുക്കിയുടെ ആഗ്രഹം. സിവില്‍ പൊലീസ് ഓഫീസറായ അച്ഛന്‍ സജീവും അമ്മ സുജിതയും മകളുടെ ഏത് സ്വപ്‌നങ്ങളുടെ ചിറകു വിടര്‍ത്താനും കൂടെയുണ്ട്.
