ലോഗോയില്‍ പത്ത് വര്‍ഷത്തിന് ശേഷം മാറ്റം വരുത്തി ഗൂഗിള്‍. ഏറെ പ്രശസ്തമായ ജി എന്നെഴുതിയ ലോഗോയില്‍ നിസ്സാര മാറ്റങ്ങളാണ് ഗൂഗിള്‍ വരുത്തിയിരിക്കുന്നത്. മാറ്റം എന്താണെന്ന് മനസിലാകണമെങ്കില്‍ ലോഗോയില്‍ സൂക്ഷിച്ചുനോക്കേണ്ടി വരും. നേരത്തെ നാല് നിറങ്ങള്‍ വ്യത്യസ്ത ബ്ലോക്കുകളായിട്ടായിരുന്നു ഗൂഗിളിന്റെ ലോഗോയില്‍ വിന്യസിച്ചിരുന്നത്. ചുവപ്പ്, മഞ്ഞ, പച്ച നീല നിറങ്ങള്‍ നിലനിര്‍ത്തികൊണ്ട് അവ ഗ്രേഡിയന്റായി വിന്യസിച്ചതാണ് പുതിയ മാറ്റം.
ഗൂഗിളിന്റെ നിര്‍മിത ബുദ്ധി ചാറ്റ്‌ബോട്ടായ ജെമിനിയുടെ ലോഗോയില്‍ ഗ്രേഡിയന്റായാണ് നിറങ്ങള്‍ വിന്യസിച്ചിരിക്കുന്നത്. ഇതിനോട് സാമ്യമുള്ളതാണ് ഗൂഗിളിന്റെ മാറ്റംവരുത്തിയ ലോഗോ. അതേസമയം മാറ്റം വരുത്തിയ ഗൂഗിളിന്റെ ലോഗോ ഐഒഎസ്, പിക്‌സല്‍ ഫോണുകളിലാവും ഉടന്‍ ലഭ്യമാവുക. മറ്റു ഉപകരണങ്ങളിലേക്ക് വൈകാതെ എത്തുമെന്നാണ് അറിയുന്നത്.
Read more
2015 സെപ്റ്റംബറിലാണ് ഒടുവില്‍ ഗൂഗിള്‍ ലോഗോയില്‍ കാര്യമായ മാറ്റംവരുത്തിയത്. ഗുഗിള്‍ ലോഗോയിലെ മാറ്റത്തിന് പിന്നാലെ പലതരത്തിലുളള അഭിപ്രായങ്ങളുമായാണ് ആളുകള്‍ എത്തുന്നത്. പഴയ ലോഗോയാണ് നല്ലത് എന്ന് ചിലര്‍ അഭിപ്രായപ്പെടുന്നു. അതേസമയം, മാറ്റം ചെറുതാണെങ്കിലും എഐ കാലത്തിന് അനുസരിച്ച് ആധുനികമാണ് പുതിയ ലോഗോയെന്നാണ് മറ്റുചിലര്‍ പറയുന്നത്.
