ഇന്ത്യന്‍ സൂപ്പര്‍ ലീഗ് ഒന്‍പതാം സീസണ്‍ ആരംഭിക്കാന്‍ ഇനി വെറും ദിവസങ്ങള്‍ മാത്രം. കൊച്ചി കലൂര്‍ ജവഹര്‍ലാല്‍ നെഹ്‌റു സ്റ്റേഡിയത്തില്‍ നടക്കുന്ന ആദ്യ മത്സരത്തില്‍ കേരളാ ബ്ലാസ്റ്റേഴ്സ് ഈസ്റ്റ് ബംഗാള്‍ എഫ്‌സിയെ നേരിടും. പരിശീലകന്‍ ഇവാന്‍ വുകമാനോവിച്ചിന്റെ കീഴില്‍ മികച്ച പ്രകടനമാകും ബ്ലാസ്റ്റേഴ്സ് കാഴ്ചവയ്ക്കുക എന്നാണ് വിലയിരുത്തല്‍. ഇപ്പോഴിതാ ഈ വര്‍ഷം കേരള ബ്ലാസ്റ്റേഴ്സ് എഫ്സിയുടെ ടീം വളരെ സന്തുലിതമാണെന്ന് അഭിപ്രായപ്പെട്ടിരിക്കുകയാണ് ഇന്ത്യന്‍ മുന്‍ താരം ജോ പോള്‍ അഞ്ചേരി.
ഈ വര്‍ഷം കേരള ബ്ലാസ്റ്റേഴ്സ് എഫ്സിയുടെ ടീം വളരെ സന്തുലിതമാണ്. നിലവിലുള്ള ടീമിന് ആവശ്യമുള്ള കളിക്കാരെ നിലനിര്‍ത്തി അവര്‍ നല്ല പുതിയ കളിക്കാരെ കൊണ്ടുവന്നു. കഴിഞ്ഞ സീസണിലെ അതേ മധ്യനിരയാണ് കളിക്കുന്നത്, എന്നാല്‍ പുതിയ സ്ട്രൈക്കിംഗ് പവറില്‍. പ്രീസീസണിലും അവര്‍ മികച്ച പ്രകടനം നടത്തി.
ഗോള്‍ കീപ്പിങ്ങില്‍ കഴിഞ്ഞ സീസണില്‍ പ്രഭ്‌സുഖന്‍ സിംഗ് ഗില്‍ നടത്തിയ മികച്ച പ്രകടനം തുടരുമെന്ന് പ്രതീക്ഷിക്കുന്നു. ഹെഡ് കോച്ച് ഇവാന്‍ വുകോമാനോവിച്ച് പഴയ ടീം ഫോര്‍മേഷന്‍ തന്നെ ഉപയോഗിക്കാനാണ് സാധ്യത, എന്നാല്‍ ഓരോ കളിക്കാരന്റെയും ചുമതല വ്യത്യസ്തമായിരിക്കും.
Read more
കേരള ബ്ലാസ്റ്റേഴ്സ് എഫ്സി അവരുടെ രണ്ട് സ്ട്രൈക്കര്‍മാര്‍ പോയതിന്റെ വിടവ് നികത്തി രണ്ട് പുതിയ താരങ്ങളെ ടീമിന്റെ ഭാഗമാക്കി. മികച്ച ഇന്ത്യന്‍ സൈനിംഗുകളും അവര്‍ നടത്തിയിട്ടുണ്ടെന്നും ജോ പോള്‍ അഞ്ചേരി വിലയിരുത്തി.
