രാജസ്ഥാൻ റോയൽസിനായി ഇക്കഴിഞ്ഞ ഐപിഎൽ സീസണിൽ ​ഗംഭീര പ്രകടനം കാഴ്ചവച്ച താരമാണ് വൈഭവ് സൂര്യവൻഷി. ​ഗുജറാത്ത് ടൈറ്റൻസിനെതിരായ മത്സരത്തിൽ 35 ബോളിൽ സെഞ്ച്വറിയടിച്ചായിരുന്നു 14കാരനായ കൗമാര താരം ക്രിക്കറ്റ് പ്രേമികളെ ഒന്നടങ്കം ഞെട്ടിച്ചത്. 1.10 കോടി രൂപയ്ക്ക് എന്തിനാണ് വൈഭവിനെ ടീമിലെടുത്തത് എന്ന് ചോദിച്ചവർക്കെല്ലാം വായടപ്പിക്കുന്ന മറുപടിയാണ് തന്റെ സെഞ്ച്വറി ഇന്നിങ്സിലൂടെ താരം നൽകിയത്.

രാജസ്ഥാൻ റോയൽസിനായി ഈ സീസണിൽ എഴ് മത്സരങ്ങളിൽ നിന്നായി 252 റൺസാണ് വൈഭവ് അടിച്ചൂകൂട്ടിയത്. കൂടാതെ എറ്റവുമുയർന്ന സ്ട്രൈക്ക് റേറ്റിനുളള കർവ് സൂപ്പർ സ്ട്രൈക്കർ പുരസ്കാരവും വൈഭവിന് ലഭിച്ചിരുന്നു. പിന്നീട് ദേശീയ ക്രിക്കറ്റ് അക്കാദമിയിൽ നടന്ന പരിശീലന മത്സരത്തിൽ 90 പന്തിൽ 190 റൺസ് നേടിയും വൈഭവ് തിളങ്ങി.

ഇപ്പോൾ വൈഭവ് സൂര്യവൻഷിയുടെ പതിമൂന്നുകാരനായ കൂട്ടുകാരനാണ് വാർത്തകളിൽ നിറയുന്നത്. വൈഭവിന്റെ സുഹൃത്തും ബിഹാർ താരവുമായ അയാൻ രാജാണ് 134 പന്തിൽ 327 റൺസ് നേടി വൈറൽ താരമായിരിക്കുന്നത്. മുസാഫർപൂരിൽ നടന്ന ഡിസ്ട്രിക്റ്റ് ക്രിക്കറ്റ് ലീഗിലാണ് കൗമാര താരം ഇത്രയും പന്തുകളിൽ ട്രിപ്പിൾ സെഞ്ച്വറി നേടിയതെന്ന് റിപ്പോർട്ടുകൾ സൂചിപ്പിക്കുന്നു.

30 ഓവർ മത്സരത്തിൽ 22 സിക്സും 41 ഫോറുകളുമാണ് അയാൻ നേടിയത്. ബിഹാറിലെ സൻസ്ക്രിതി ക്രിക്കറ്റ് അക്കാദമിക്ക് വേണ്ടിയാണ് കൗമാര താരം കളിക്കുന്നത്. ഇന്നിങ്സിലെ ഭൂരിഭാ​ഗം പന്തുകളും അയാൻ തന്റെ ടീമിനായി നേരിടുകയായിരുന്നു.