ടി20 ക്രിക്കറ്റിൽ ആദ്യമായി മൂന്ന് സൂപ്പർ ഓവറുകൾ നടന്ന ഒരു മത്സരമുണ്ടായി. ക്രിക്കറ്റ് ലോകത്ത് പുതിയ ചരിത്രമെഴുതികൊണ്ടാണ് ഈ കളി നടന്നത്. നെതർലൻഡ്സും നേപ്പാളും തമ്മിലുളള ടി20 മത്സരത്തിലായിരുന്നു ഇതുവരെ നടക്കാത്ത ഒരു സംഭവം നടന്നത്. സ്കോട്ട്ലൻഡിലെ ​ഗ്ലാസ്​ഗോയിൽ വച്ച് നടന്ന ത്രിരാഷ്ട്ര ടി20 പരമ്പരയിലാണ് ചരിത്രം പിറന്നത്. സ്കോട്ട്ലൻഡ്, നെതർലൻഡ്സ്, നേപ്പാൾ തുടങ്ങിയ ടീമുകളാണ് ടൂർണമെൻ‌റിൽ പങ്കെടുക്കുന്നത്. പരമ്പരയിലെ രണ്ടാം മത്സരത്തിൽ ആദ്യ ബാറ്റിങ്ങിന് ഇറങ്ങിയ നെതർലൻഡ്സ് നിശ്ചിത ഓവറിൽ ഏഴ് വിക്കറ്റ് നഷ്ടത്തിൽ 152 റൺസാണ് എടുത്തത്.

മറുപടി ബാറ്റിങ്ങിൽ നേപ്പാൾ‌ എട്ട് വിക്കറ്റ് നഷ്ടത്തിൽ 152 റൺസെടുത്ത് തിരിച്ചടിച്ചു. മത്സരം ടൈ ആയതോടെ കളി സൂപ്പർ ഓവറിലേക്ക് നീങ്ങുകയായിരുന്നു. ആദ്യ സൂപ്പർ ഓവറിൽ നെതർലൻഡ്സിനെതിരെ നേപ്പാൾ ഒരു വിക്കറ്റ് നഷ്ടത്തിൽ 19 റൺസ് എടുത്തു. എന്നാൽ നെതർലൻഡ്സും മറുപടി ബാറ്റിങ്ങിൽ നേപ്പാളിന്റെ അതേ സ്കോറിലെത്തി. ഇതോടെ കളി രണ്ടാം സൂപ്പർ ഓവറിലേക്ക് നീങ്ങുകയായിരുന്നു.

രണ്ടാം സൂപ്പർ ഓവറിൽ നെതർലൻഡ്സാണ് ആദ്യം ബാറ്റ് ചെയ്തത്. ആദ്യ ബാറ്റിങ്ങിൽ നെതർലൻഡ്സ് ടീം ഒരു വിക്കറ്റ് നഷ്ടത്തിൽ 17 റൺസാണ് എടുത്തത്. എന്നാൽ മറുപടി ബാറ്റിങ്ങിൽ നേപ്പാൾ ബാറ്റർ ദീപേന്ദ്ര സിങ് അവസാന പന്തിൽ സിക്സർ പറഞ്ഞി നെതർലൻഡ്സിന്റെ ടീം സ്കോറിനൊപ്പം എത്തി. ഇതോടെയാണ് ക്രിക്കറ്റ് ചരിത്രത്തിലെ ആദ്യത്ത മൂന്നാം സൂപ്പർ ഓവർ സംഭവിച്ചത്.

എന്നാൽ ഇത്തവണ വിജയം നെതർലൻഡ്സ് ടീമിനൊപ്പമായിരുന്നു. ആദ്യ ബാറ്റിങ്ങിനിറങ്ങിയ നേപ്പാൾ തുടക്കത്തിലേ തകർന്നത് അവർക്ക് തിരിച്ചടിയായി. വെറും നാല് പന്തിൽ റൺസെടുക്കുംമുൻപേ രണ്ട് നേപ്പാൾ ബാറ്റർമാരുടെയും വിക്കറ്റ് നഷ്ടമായി. മറുപടി ബാറ്റിങ്ങിൽ ആദ്യ പന്തിൽ തന്നെ സിക്സർ നേടി മൈക്കൽ ലെവിറ്റ് നെതർലൻഡ്സിന് മത്സരത്തിൽ വിജയം സമ്മാനിക്കുകയായിരുന്നു.