ലോക ടെസ്റ്റ് ചാമ്പ്യൻഷിപ്പ് ഫൈനലിൽ നീണ്ട 27 വർഷത്തെ കാത്തിരിപ്പിനൊടുവിലാണ് ഓസ്ട്രേലിയയെ തോൽപ്പിച്ച് ദക്ഷിണാഫ്രിക്കയ്ക്ക് കിരീടം ലഭിച്ചത്. ഓസീസിനെ അഞ്ചു വിക്കറ്റിന് തോൽപ്പിച്ച പ്രോട്ടീസ് ഏറെക്കാലത്തിന് ശേഷം ഒരു ഐസിസി ട്രോഫിയിൽ മുത്തമിട്ടു. എയ്ഡൻ മാർക്രത്തിന്റെയും ക്യാപ്റ്റൻ ടെമ്പ ബാവുമയുടെയും ബാറ്റിങ് മികവിലായിരുന്നു ഫൈനലിൽ ദക്ഷിണാഫ്രിക്ക ജയിച്ചുകയറിയത്.

മാർക്രം 207 പന്തിൽ 136 റൺസോടെ സെഞ്ച്വറി പ്രകടനവുമായി മുന്നിൽ നിന്ന് നയിച്ചപ്പോൾ ബാവുമ അർധസെഞ്ച്വറി നേടി കാര്യമായ പിന്തുണ നൽകി. 134 പന്തിൽ അഞ്ച് ബൗണ്ടറി ഉൾപ്പെടെ 66 റൺസാണ് ബാവുമ നേടിയത്. ഫൈനലിൽ ദക്ഷിണാഫ്രിക്കയ്ക്കായി അവസാനം വരെ പോരാടിയ എയ്ഡ്ൻ മാർക്രം തന്നെയാണ് പ്ലെയർ ഓഫ് ദി മാച്ചായി തിരഞ്ഞെടുക്കപ്പെട്ടത്.

ടെസ്റ്റ് ചാമ്പ്യൻഷിപ്പ് വിജയത്തോടെ ദക്ഷിണാഫ്രിക്കൻ ടീമിന് 31.05 കോടി രൂപ സമ്മാനത്തുകയാണ് ലഭിക്കുക. ഫൈനലിൽ റണ്ണറപ്പായ ഓസീസ് ടീമിന് 18.63 കോടി രൂപയും ലഭിക്കും. ഫൈനലിൽ എത്തിയില്ലെങ്കിലും ലോക ടെസ്റ്റ് ചാമ്പ്യൻഷിപ്പ് സൈക്കിളിൽ മൂന്നാമതായിരുന്നു ഇന്ത്യ ഫിനിഷ് ചെയ്തത്. ഇന്ത്യൻ ടീമിന് 12.42 കോടി രൂപയാണ് ലഭിക്കുക.