സൂപ്പർ ബാറ്റർ ശ്രേയസ് അയ്യർക്ക് ഇന്ത്യൻ ക്രിക്കറ്റ് കൺട്രോൾ ബോർഡിന്റെ (ബിസിസിഐ) സെന്റർ ഓഫ് എക്സലൻസിൽ (സിഒഇ) നിന്ന് ഫിറ്റ്നസ് ക്ലിയറൻസ് ലഭിച്ചു. ഇതോടെ ജനുവരി 11 ന് വഡോദരയിൽ ആരംഭിക്കുന്ന ന്യൂസിലൻഡിനെതിരായ മൂന്ന് മത്സരങ്ങളുള്ള ഏകദിന പരമ്പരയിൽ അദ്ദേഹത്തിന്റെ തിരിച്ചുവരവ് ഉറപ്പായി.
ജനുവരി 3 ന് പ്രഖ്യാപിച്ച ന്യൂസിലൻഡ് പരമ്പരയ്ക്കുള്ള ഇന്ത്യയുടെ 15 അംഗ ടീമിൽ അദ്ദേഹത്തെ വൈസ് ക്യാപ്റ്റനായി ഉൾപ്പെടുത്തിയിരുന്നെങ്കിലും, അദ്ദേഹത്തിന്റെ പങ്കാളിത്തം മെഡിക്കൽ ക്ലിയറൻസിന് വിധേയമായിരുന്നു. 2025 ഒക്ടോബർ അവസാനം സിഡ്നിയിൽ ഓസ്ട്രേലിയയ്ക്കെതിരായ മൂന്നാമത്തെയും അവസാനത്തെയും ഏകദിന മത്സരത്തിനിടെ താരത്തിന് പരിക്കേറ്റിരുന്നു. ശേഷം താരം കളത്തിന് പുറത്തായിരുന്നു.
ജനുവരി 6 ന് മത്സര ക്രിക്കറ്റിലേക്ക് അയ്യർ തിരിച്ചെത്തി. 2025-26 ലെ വിജയ് ഹസാരെ ട്രോഫിയിൽ ഹിമാചൽ പ്രദേശിനെതിരെ മുംബൈയെ നയിച്ചു. മത്സരത്തിൽ 53 പന്തിൽ നിന്ന് 82 റൺസ് നേടി താരം തന്റെ തിരിച്ചവരവ് അറിയിച്ചു.
ഏകദിന പരമ്പരയിൽ കളിക്കാൻ സിഒഇ ഇപ്പോൾ അയ്യർക്ക് ഗ്രീൻ സിഗ്നൽ നൽകിയിട്ടുണ്ട്. അയ്യറുടെ പുനരധിവാസം വിജയകരമായി പൂർത്തിയാക്കിയതായി സിഒഇ മേധാവി വിവിഎസ് ലക്ഷ്മൺ ചീഫ് സെലക്ടർ അജിത് അഗാർക്കറെ ഇമെയിൽ വഴി അറിയിച്ചതായും റിപ്പോർട്ടിൽ പറയുന്നു.
Read more
വഡോദരയിൽ പരമ്പരയിലെ ആദ്യ മത്സരം നടക്കുമ്പോൾ, ശേഷിക്കുന്ന മത്സരങ്ങൾ ജനുവരി 14 ന് രാജ്കോട്ടിലും ജനുവരി 18 ന് ഇൻഡോറിലും നടക്കും.
