ഇന്ത്യന്‍ ടീമിന്റെ പരിശീലക സ്ഥാനം ഒഴിയുന്ന രവി ശാസ്ത്രി വരുന്ന ഐപിഎല്‍ സീസണില്‍ പുതിയതായി എത്തുന്ന അഹമ്മദാബാദില്‍ നിന്നുള്ള ടീമിനെ പരിശീലിപ്പിക്കുമെന്ന് റിപ്പോര്‍ട്ടുകള്‍. ശാസ്ത്രിക്കൊപ്പം ഇന്ത്യന്‍ ടീമിന്റെ പരിശീലക സംഘത്തില്‍ ഉള്‍പ്പെട്ടവരും അഹമ്മദാബാദ് പരിശീലക സംഘത്തിലുണ്ടാവുമെന്നാണ് സൂചന.
രവി ശാസ്ത്രിയേയും അദ്ദേഹത്തിനൊപ്പം ഇന്ത്യന്‍ ടീമിന്റെ സപ്പോര്‍ട്ട് സ്റ്റാഫിലുള്ള ഭരത് അരുണ്‍, ആര്‍ ശ്രീധര്‍ എന്നിവരേയും തങ്ങളുടെ കോച്ചിംഗ് സ്റ്റാഫില്‍ ഉള്‍പ്പെടുത്താന്‍ അഹമ്മദാബാദ് ഫ്രാഞ്ചൈസിയുടെ ഉടമസ്ഥരായ സിവിസി ക്യാപിറ്റല്‍സിന് താല്പര്യം പ്രകടിപ്പിച്ചെന്നാണ് റിപ്പോര്‍ട്ട്. നിലവില്‍ ടി20 ലോക കപ്പിന്റെ തിരക്കിലായതിനാല്‍ തനിക്ക് തീരുമാനമെടുക്കാന്‍ അല്പം സമയം ആവശ്യമാണെന്ന് ശാസ്ത്രി അവരെ അറിയിച്ചതായാണ് അറിയുന്നത്.
Read more
സണ്‍റൈസേഴ്സ് ഹൈദരാബാദിന്റെ മുന്‍ നായകന്‍ ഓസീസ് ഓപ്പണര്‍ ഡേവിഡ് വാര്‍ണര്‍ അഹമ്മദാബാദ് ടീമിന്റെ നായകനാവുമെന്നാണ് സൂചന. ഡിസംബറില്‍ പുതിയ ലേലത്തിന് മുന്നോടിയായുള്ള താരലേലം നടക്കും. പുതിയതായി എത്തുന്ന ടീമുകള്‍ക്ക് മൂന്ന് താരങ്ങളെ ലേലത്തിന് മുമ്പ് തന്നെ സ്വന്തമാക്കാന്‍ അവസരമുണ്ട്. കെഎല്‍ രാഹുലിനെ ടീമിലെത്തിക്കാനും അഹമ്മദാബാദിന് പദ്ധതിയുണ്ടെന്നാണ് വിവരം.
