തുടര്‍ച്ചയായി തോല്‍വികള്‍ ഏറ്റുവാങ്ങി ഈ സീസണില്‍ ആരാധകര്‍ക്ക് നിരാശ മാത്രം സമ്മാനിച്ച ടീമുകളിലൊന്നാണ് രാജസ്ഥാന്‍ റോയല്‍സ്. സഞ്ജു സാംസണ്‍ ഉള്‍പ്പെടെയുളളവര്‍ക്ക് പരിക്കേറ്റത് ടീമിന് വലിയ തിരിച്ചടിയായി മാറിയിരുന്നു. കഴിഞ്ഞ കളിയില്‍ സഞ്ജു തിരിച്ചെത്തിയെങ്കിലും പ്രതീക്ഷകളെല്ലാം ആദ്യമേ അവസാനിച്ച ടീം ഇന്നലെയും തോല്‍വി ഏറ്റുവാങ്ങി. ആര്‍ആറിന്റെ മോശം സീസണില്‍ കൂടുതല്‍ പേരും വിമര്‍ശിച്ചത്‌ ടീം കോച്ച് രാഹുല്‍ ദ്രാവിഡിനെയാണ്. മുന്‍ സീസണുകളില്‍ ഉണ്ടായിരുന്ന ഒരു ബാലന്‍സ്ഡ് ലൈനപ്പ് ആര്‍ആറിന് ഇത്തവണ ഇല്ലാതെ പോയതാണ് ആരാധകര്‍ ദ്രാവിഡിനെതിരെ തിരിയാന്‍ കാരണമായത്.
മിക്കവരും കുറ്റം പറയുന്ന സമയങ്ങളില്‍ അധികം സംസാരിക്കാതെ വിവാദങ്ങളില്‍ നിന്നും ദ്രാവിഡ് വിട്ടുനില്‍ക്കുമായിരുന്നു. ഇപ്പോഴിതാ സീസണിലെ ടീമിന്റെ പ്രകടനത്തില്‍ രാജസ്ഥാന്‍ റോയല്‍സ് കോച്ച് ഒടുവില്‍ പ്രതികരിച്ചിരിക്കുകയാണ്. ബാറ്റിങ്ങില്‍ മാത്രമല്ല, ബോളിങ്ങിലും മികച്ച പ്രകടനം കാഴ്ചവയ്ക്കാന്‍ ടീമിന് ഈ സീസണില്‍ സാധിച്ചിട്ടില്ലെന്ന് ദ്രാവിഡ് പറയുന്നു.
Read more
“ഈ സീസണിലെ മുഴുവന്‍ സ്ഥിതിവിവരക്കണക്കുകള്‍ പരിശോധിച്ചാല്‍, വിക്കറ്റുകള്‍ വീഴ്ത്തുന്നതിലും റണ്‍സ് നിയന്ത്രിക്കുന്നതിലും ഉള്‍പ്പെടെ ബൗളിംഗില്‍ ഞങ്ങള്‍ക്ക് മികച്ച പ്രകടനം കാഴ്ചവയ്ക്കാന്‍ കഴിഞ്ഞിട്ടില്ല, പത്ത് മത്സരങ്ങളില്‍ ഒമ്പതിലും ഞങ്ങള്‍ ചേസ് ചെയ്യുകയായിരുന്നു. ഇതില്‍ ഒരു ഒഴികഴിവും പറയാനാകില്ല. ഞങ്ങള്‍ ജയിക്കണമായിരുന്നു. ഈ ടൂര്‍ണമെന്റില്‍ ഒരു ടീമിന് മികച്ച പ്രകടനം കാഴ്ചവയ്ക്കണമെങ്കില്‍, നിങ്ങള്‍ അടുത്ത അഞ്ച് മത്സരങ്ങളില്‍ തോല്‍ക്കരുത്. നിങ്ങള്‍ക്ക് 1-2ന് തോല്‍ക്കാം, പക്ഷേ നിര്‍ണായകമായ അടുത്ത മത്സരങ്ങളില്‍ തോല്‍ക്കാന്‍ കഴിയില്ല”, പഞ്ചാബിനെതിരായ മത്സരശേഷം ദ്രാവിഡ് പറഞ്ഞു.
