ആര്‍സിബി-കെകെആര്‍ മത്സരം ഉപേക്ഷിച്ചതോടെ ഈ സീസണില്‍ കൊല്‍ക്കത്ത നൈറ്റ് റൈഡേഴ്‌സിന്റെ കാര്യത്തില്‍ ഒരു തീരുമാനമായിരിക്കുകയാണ്. ഇനി ഒരു മത്സരം കൂടി ബാക്കിയുണ്ടെങ്കിലും അവരുടെ പ്ലേഓഫ് പ്രതീക്ഷകളെല്ലാം അവസാനിച്ചു. രഹാനെ നായകസ്ഥാനം ഏറ്റെടുത്ത ശേഷം കെകെആര്‍ ശ്രദ്ധേയ പ്രകടനം ഈ വര്‍ഷം കാഴ്ചവച്ചെങ്കിലും ചില പ്രധാന താരങ്ങള്‍ പ്രതീക്ഷയ്‌ക്കൊത്ത് ഉയരാത്തത് ടീമിന് തിരിച്ചടിയായി. ഇതില്‍ കഴിഞ്ഞ ലേലത്തില്‍ കൂടുതല്‍ തുകയ്ക്ക് ടീമില്‍ എടുത്ത വെങ്കിടേഷ് അയ്യരാണ് ഒന്നാമതുളളത്.
23.75 കോടിക്കായിരുന്നു വെങ്കിടേഷിനെ കൊല്‍ക്കത്ത മാനേജ്‌മെന്റ് ലേലത്തില്‍ എടുത്തത്. 11 മത്സരങ്ങളിലെ ഏഴ് ഇന്നിങ്‌സുകളില്‍ നിന്ന് വെറും 142 റണ്‍സ് മാത്രമാണ് ഈ സീസണില്‍ വെങ്കിടേഷ് അയ്യര്‍ നേടിയത്. 20 ആണ് ശരാശരി. ഒരു അര്‍ധസെഞ്ച്വറി മാത്രം നേടിയ താരത്തിന്റെ സീസണിലെ ഉയര്‍ന്ന സ്‌കോര്‍ 60 റണ്‍സാണ്. മുന്‍സീസണുകളില്‍ ടോപ് ഓര്‍ഡര്‍, മിഡില്‍ ഓര്‍ഡര്‍ എന്നീ ബാറ്റിങ് പൊസിഷനുകളില്‍ മാറി മാറി വെങ്കിടേഷ് കളിച്ചിട്ടുണ്ട്.
അപ്പോഴെല്ലാം ശ്രദ്ധേയ പ്രകടനമാണ് താരം കാഴ്ചവച്ചിരുന്നത്. എന്നാല്‍ ഈ വര്‍ഷം ബാറ്റിങ് പൊസിഷനില്‍ ഇടയ്ക്കിടെ മാറ്റം വരുത്തിയെങ്കിലും കാര്യമായി സ്‌കോര്‍ ചെയ്യാന്‍ വെങ്കിടേഷിനായില്ല. ഇനിയും പ്രതീക്ഷയ്‌ക്കൊത്ത് ഉയര്‍ന്നില്ലെങ്കില്‍ താരത്തെ ടീം മാനേജ്‌മെന്റ് അടുത്ത ലേലത്തില്‍ കൈവിടാന്‍ സാധ്യതയുണ്ട്. 2021ല്‍ ഐപിഎലില്‍ അരങ്ങേറ്റം കുറിച്ച വെങ്കിടേഷ് ഇതുവരെ 62 മത്സരങ്ങളില്‍ 1468 റണ്‍സാണ് നേടിയിട്ടുളളത്.
Read more
