ഐപിഎല്‍ പുതിയ സീസണിന് മുന്നോടിയായി രണ്ട് പ്രമുഖ ടീമുകള്‍ മലയാളി താരവും രാജസ്ഥാന്‍ റോയല്‍സ് നായകനുമായ സഞ്ജു സാംസണിനെ സമീപിച്ചിരുന്നതായി റിപ്പോര്‍ട്ടുകള്‍. നിലവിലെ ചാമ്പ്യന്മാരും അഞ്ചു തവണ ജേതാക്കളുമായ ചെന്നൈ സൂപ്പര്‍ കിംഗ്സായിരുന്നു ഇതിലൊരു ടീം.
അടുത്ത സീസണിനു ശേഷം വിരമിക്കാന്‍ തയ്യാറെടുക്കുന്ന ഇതിഹാസ നായകനും വിക്കറ്റ് കീപ്പറുമായ എംഎസ് ധോണിക്കു പകരക്കാരനായാണ് സഞ്ജുവിനെ സിഎസ്‌കെ നോട്ടമിട്ടതെന്നാണ് വിവരം. എന്നാല്‍ ചൈന്നെയും വമ്പന്‍ ഓഫര്‍ നിരസിച്ച് സഞ്ജു രാജസ്ഥാനില്‍ തുടരാനാണ് തന്റെ തീരുമാനമെന്ന് അറിയിച്ചു.
ഐപിഎല്ലില്‍ ഇനിയും കിരീടം നേടിയിട്ടില്ലാത്ത പഞ്ചാബ് കിംഗ്സാണ് സഞ്ജുവിനെ സമീപിച്ച രണ്ടാമത്തെ ഫ്രാഞ്ചൈസി. നായക സ്ഥാനത്തേക്ക് പരിഗണിക്കാന്‍ തന്നെയായിരുന്നു പഞ്ചാബിന്റെയും പ്ലാന്‍. പക്ഷെ പഞ്ചാബിന്റെ ഓഫറും സഞ്ജു നിരസിച്ചു.
Read more
ഒമ്പതു സീസണുകളായി റോയല്‍സ് ടീമിന്റെ ഭാഗമാണ് സഞ്ജു. ഫ്രാഞ്ചൈസിയെ സംബന്ധിച്ച് അദ്ദേഹം അവര്‍ക്കു ഐക്കണ്‍ താരമായി മാറിക്കഴിഞ്ഞു. 2021ലെ സീസണിനു മുമ്പാണ് റോയല്‍സ് ടീമിന്റെ നായകസ്ഥാനത്തേക്കു സഞ്ജു എത്തിയത്. 2022 ല്‍ ഫൈനലിലെത്തിയതാണ് മികച്ച പ്രകടനം.
