ഫ്രാഞ്ചൈസി ക്രിക്കറ്റിലെ ഏറ്റവും വലിയ ആര്‍ഭാടമായ ഇന്ത്യന്‍ പ്രീമിയര്‍ ലീഗ് 16ാം സീസണ്‍ പ്ലേഓഫുകളിലേക്കുള്ള ഓട്ടത്തോടെ അതിന്റെ അവസാനത്തിലേക്ക് നീങ്ങുകയാണ്. ഗുജറാത്ത് ടൈറ്റന്‍സ് ടീം മാത്രമാണ് ഇതുവരെ പ്ലേ ഓഫിലേക്ക് യോഗ്യത നേടിയത്. ബാക്കി ഓരോ ടീമും പ്ലേഓഫില്‍ സ്ഥാനം നേടാന്‍ നോക്കുമ്പോള്‍ ടൂര്‍ണമെന്റ് ആവേശകരമായ ഫിനിഷിംഗ് വാഗ്ദാനം ചെയ്യുന്നു.
ഇതിനെല്ലാം ഇടയില്‍, റോയല്‍ ചലഞ്ചേഴ്സ് ബാംഗ്ലൂരിന്റെ തുടര്‍ച്ചയായ വിജയങ്ങള്‍ ഇപ്പോഴും പ്ലേഓഫിനായി മത്സരിക്കുന്ന മറ്റ് ടീമുകള്‍ക്ക് പിരിമുറുക്കം വര്‍ദ്ധിപ്പിച്ചിട്ടുണ്ടെന്ന് ഇന്ത്യന്‍ കമന്റേറ്റര്‍ ആകാശ് ചോപ്ര പറഞ്ഞു. അഞ്ച് ദിവസം മുമ്പ്് രാജസ്ഥാന്‍ റോയല്‍സിനെതിരെ 112 റണ്‍സിന്റെ തകര്‍പ്പന്‍ ജയം നേടിയ ആര്‍സിബി, വ്യാഴാഴ്ച നടന്ന മത്സരത്തില്‍ സണ്‍റൈസേഴ്‌സ് ഹൈദരാബാദിനെ എട്ട് വിക്കറ്റിന് പരാജയപ്പെടുത്തി പ്ലേ ഓഫ് യോഗ്യതയ്ക്കുള്ള സാധ്യതകള്‍ ശക്തിപ്പെടുത്തി.
പ്ലേഓഫിലേക്കുള്ള പോരാട്ടത്തില്‍ ബാംഗ്ലൂര്‍ ജീവനോടെയുണ്ട്. അവര്‍ ശരിയായ രീതിയില്‍ ജീവിച്ചിരിക്കുന്നു. അവസാന രണ്ട് മത്സരങ്ങളും അവര്‍ ആധികാരികമായി വിജയിച്ചു. അതിനാല്‍, മറ്റ് ടീമുകള്‍ അല്‍പ്പം ഭയപ്പെടണം. പക്ഷേ ആരാണ് മുന്നേറുമെന്ന് ഞായറാഴ്ച വൈകുന്നേരം മാത്രമേ അറിയൂ- ചോപ്ര പറഞ്ഞു.
നിലവില്‍ 13 മത്സരങ്ങളില്‍നിന്ന് 18 പോയിന്റുള്ള ഗുജറാത്ത് ടൈറ്റന്‍സ് മാത്രമാണ് പ്ലേഓഫില്‍ കടന്നിട്ടുള്ളത്. ശേഷിച്ച മൂന്നു പ്ലേഓഫ് ടിക്കറ്റുകള്‍ക്കായി ചെന്നൈ (15 പോയിന്റ്), ലഖ്‌നൗ (15), ബാംഗ്ലൂര്‍ (14), മുംബൈ (14), രാജസ്ഥാന്‍ (12) എന്നീ അഞ്ചു ടീമുകളാണ് പ്രധാനമായും പോരടിക്കുന്നത്. കൊല്‍ക്കത്ത നൈറ്റ്‌റൈഡേഴ്‌സ് (12), പഞ്ചാബ് കിംഗ്‌സ് (12) എന്നിവര്‍ക്കും നേരിയ സാധ്യത നിലനില്‍ക്കുന്നു.
Read more
ഞായറാഴ്ച ജിടിയുമായിട്ടാണ് ആര്‍സിബിയുടെ അവസാന മല്‍സരം. വലിയൊരു മാര്‍ജിനില്‍ ഈ മല്‍സരം ജയിച്ചാല്‍ 16 പോയിന്റോടെ ആര്‍സിബി പ്ലേഓഫിലെത്തും. എന്നാല്‍ തോല്‍ക്കുകയാണെങ്കില്‍ എസ്ആര്‍എച്ച് മുംബൈയെ പരാജയപ്പെടുത്തണം. അങ്ങനെ വന്നാല്‍ മികച്ച നെറ്റ് റണ്‍റേറ്റില്‍ ആര്‍സിബി പ്ലേഓഫിലെത്തും.
