ഡല്ഹി ക്യാപിറ്റല്സിനെതിരെ മുംബൈ ഇന്ത്യന്സിനായി വെടിക്കെട്ട് ബാറ്റിങ് പ്രകടനം കാഴ്ചവച്ച സൂര്യകുമാര് യാദവിനെ പുകഴ്ത്തി മുന് ഇന്ത്യന് താരം ഹര്ഭജന് സിങ്. ഈ സീസണിലെ എറ്റവും മികച്ച ഇന്നിങ്സാണ് സൂര്യ ഇന്നലെ കാഴ്ചവച്ചതെന്ന് ഹര്ഭജന് അഭിപ്രായപ്പെട്ടു. 43 പന്തുകളില് ഏഴ് ഫോറും നാല് സിക്സും ഉള്പ്പെടെ 73 റണ്സാണ് സൂര്യ ഇന്നലെ നേടിയത്. 169.77 ആയിരുന്നു സ്ട്രൈക്ക് റേറ്റ്. താരത്തിന്റെ ബാറ്റിങ് മികവിലാണ് ഡല്ഹിക്കെതിരെ 180 റണ്സ് എന്ന മികച്ച സ്കോര് മുംബൈ നേടിയത്.
വാംഖഡെ സ്റ്റേഡിയത്തിലെ ബുദ്ധിമുട്ടേറിയ ബാറ്റിങ് സാഹചര്യത്തില് സൂര്യ കാഴ്ചവച്ച ഇന്നിങ്സിനെ പുകഴ്ത്തിയാണ് ഹര്ഭജന് രംഗത്തെത്തിയത്. ഒരു മികച്ച കളിക്കാരന്റെ ലക്ഷണം എന്താണെന്നുവച്ചാല് കളിയെ ആഴത്തില് മനസിലാക്കുക എന്നതാണെന്ന് ഹര്ഭജന് പറയുന്നു. “അയാള്ക്ക് തന്നില്ത്തന്നെ വളരെയധികം വിശ്വാസമുണ്ടാകും, അവസാനം വരെ ആ താരം തുടര്ന്നാല് കളിയുടെ മുഖച്ഛായ മാറ്റാന് അദ്ദേഹത്തിന് കഴിയും, സൂര്യകുമാര് യാദവ് ഒരു തവണയല്ല, ആയിരക്കണക്കിന് തവണ ഇത് ചെയ്യുന്നത് നമ്മള് കണ്ടിട്ടുണ്ട്”, ഹര്ഭജന് പറഞ്ഞു.
Read more
“സാഹചര്യങ്ങളുടെ ആവശ്യകത മനസ്സിലാക്കി അദ്ദേഹം കളിയെ വളരെ ആഴത്തില് ഏറ്റെടുത്തു, അവസരം ലഭിച്ചപ്പോള്, മത്സരത്തെ എതിരാളികളില് നിന്ന് കൊണ്ടുപോയി. സൂര്യകുമാറിന്റെ സീസണിലെ ഏറ്റവും മികച്ച ഇന്നിംഗ്സാണിതെന്ന് എനിക്ക് തോന്നുന്നു. മറ്റ് ഇന്നിംഗ്സുകള് വളരെ വേഗത്തില് വന്നിരിക്കാം, പക്ഷേ ഇന്നത്തെ സാഹചര്യങ്ങളില് ബൗളര്മാര് മോശമല്ലാത്ത ഫോമിലായിരുന്നു”, മുന് ഇന്ത്യന് സ്പിന്നര് കൂട്ടിച്ചേര്ത്തു.
