ഇം​ഗ്ലണ്ടിനെതിരായ അഞ്ച് മത്സരങ്ങൾ അടങ്ങുന്ന ടെസ്റ്റ് പരമ്പരയ്ക്കായുളള ഒരുക്കങ്ങളിലാണ് ഇന്ത്യൻ ടീം. ഇതിനായി കുറച്ചുദിവസം മുൻപ് തന്നെ ടീം ഇം​ഗ്ലണ്ടിൽ എത്തിയിരുന്നു. യുവനിരയ്ക്ക് പ്രാധാന്യം നൽകിയുളള ലൈനപ്പാണ് ഇത്തവണ ഇന്ത്യയുടേത്. ശുഭ്മാൻ ​ഗിൽ ക്യാപ്റ്റനായ ടീമിൽ പ്രതിഭയുളള നിരവധി താരങ്ങളുണ്ട്. ഇം​ഗ്ലണ്ടിനെതിരെ ഓപ്പണർമാരായി യശസ്വി ജയ്സ്വാളും കെഎൽ രാഹുലും തന്നെ ഇറങ്ങാനാണ് സാധ്യത. വലിയ സമ്മർദമാണ് നിലവിൽ ഇന്ത്യൻ ബാറ്റർമാർക്ക് പരമ്പരയ്ക്ക് മുന്നോടിയായുളളത്. ആതിഥേയർ എന്ന നിലയിൽ സീരീസിൽ ഇം​ഗ്ലണ്ടിനാണ് മുൻതൂക്കമുളളത്.

ഇം​ഗ്ലണ്ടിൽ അവസാനം നടന്ന ടെസ്റ്റ് പരമ്പര 2-2 എന്ന നിലയിലാണ് അവസാനിച്ചത്. ഫാസ്റ്റ് ബോളർമാരെ കൂടുതൽ സഹായിക്കുന്ന പിച്ചുകളാണ് ഇം​ഗ്ലണ്ടിലുളളത്. അതുകൊണ്ട് തന്നെ ഇം​ഗ്ലീഷ് ബോളർമാരെ അവരുടെ തട്ടകത്തിൽ നേരിടുക എന്നത് ഇന്ത്യൻ ബാറ്റർമാർക്ക് വലിയ വെല്ലുവിളിയാവും. ഇം​ഗ്ലണ്ടിൽ ഇതുവരെ കളിച്ചിട്ടില്ലാത്ത താരമാണ് ജയ്സ്വാൾ. അതുകൊണ്ട് തന്നെ നല്ല സമ്മർദമുണ്ടാവുക താരത്തിനായിരിക്കും.

ഇം​ഗ്ലണ്ട് ലയൺസിനെതിരായ സന്നാ​ഹ മത്സരത്തിൽ ഇന്ത്യ എ ടീമിനായി ജയ്സ്വാൾ കളിച്ചിരുന്നു. 24, 64, 17, 5 എന്നീ സ്കോറുകളാണ് സന്നാഹത്തിൽ ജയ്സ്വാൾ നേടിയത്. ഇന്ത്യൻ ടീമിൽ റിസർവ് ഓപ്പണറായുളള അഭിമന്യൂ ഈശ്വരൻ സന്നാഹ മത്സരങ്ങളിൽ മിന്നുംഫോമിലായിരുന്നു. തുടർച്ചയായി അർധസെഞ്ച്വറികൾ താരം നേടി. അതേസമയം തന്നെ ഒറ്റ സന്നാഹമേ കളിച്ചിട്ടുളളൂവെങ്കിലും ഒരു സെഞ്ച്വറിയും ഒരു അർധസെഞ്ച്വറിയുമാണ് കെഎൽ രാഹുൽ നേടിയത്.

ഇതാണ് ജയ്സ്വാളിന് സമ്മർദം കൂട്ടൂന്നത്. പരിശീലന സമയത്തിനിടെ കോച്ച് ​ഗൗതം ​ഗംഭീർ ജയ്സ്വാളിനോട് രണ്ട് തവണ ദീർഘനേരം സംസാരിച്ചിരുന്നു. കൂടാതെ കൂടുതൽ സമയം നെറ്റ്സിൽ ജയ്സ്വാൾ ബാറ്റിങ് പ്രാക്ടീസ് നടത്തുകയും ചെയ്തു. ഫാസ്റ്റ്, സ്വിങ്, സ്പിൻ തുടങ്ങി എല്ലാതരും ബോളുകളും നേരിട്ടായിരുന്നു യുവതാരത്തിന്റെ ട്രെയിനിങ്.