ഐസിസി ഹാൾ ഓഫ് ഫെയ്മിൽ ഇനി ഇന്ത്യൻ ക്രിക്കറ്റ് ഇതിഹാസം മഹേന്ദ്ര സിങ് ധോണിയും. ക്രിക്കറ്റിലെ മഹാന്മാരായ താരങ്ങളെല്ലാം ഉൾപ്പെട്ട ഐസിസി ഹാൾ ഓഫ് ഫെയ്മിൽ രാജ്യാന്തര ക്രിക്കറ്റ് കൗൺസിലാണ് ധോണിയേയും ഉൾപ്പെടുത്തിയത്. അന്താരാഷ്ട്ര ക്രിക്കറ്റ് ചരിത്രത്തിലെ എറ്റവും മികച്ച ക്യാപ്റ്റന്മാരിൽ ഒരാളായ ധോണി ഇന്ത്യൻ ക്രിക്കറ്റ് ടീമിന് വേണ്ടിയും വ്യക്തിപരമായും സ്വന്തമാക്കിയ നേട്ടങ്ങളെ ബഹുമാനിച്ചാണ് അദ്ദേഹത്തെ ഉൾപ്പെടുത്തിയത്.

ധോണിയെ കൂടാതെ വിവിധ രാജ്യങ്ങൾക്കായി കളിച്ച മറ്റ് ആറ് ഇതിഹാസ താരങ്ങളെ കൂടി ഐസിസി പുതുതായി ഹാൾ ഓഫ് ഫെയ്മിൽ ഉൾപ്പെടുത്തിയിട്ടുണ്ട്. മുൻ ദക്ഷിണാഫ്രിക്കൻ ക്യാപ്റ്റൻ ​ഗ്രയാം സ്മിത്ത്, മുൻ ദക്ഷിണാഫ്രിക്കൻ ഓപ്പണർ ഹാഷിം അംല, മുൻ ഓസ്‌ട്രേലിയൻ ഓപ്പണർ മാത്യു ഹെയ്ഡൻ, മുൻ ന്യൂസിലൻഡ് ഓൾറൗണ്ടർ ഡാനിയൽ വെട്ടോറി, മുൻ പാകിസ്ഥാൻ വനിതാ ക്യാപ്റ്റൻ സന മിർ, ഇംഗ്ലണ്ടിന്റെ സാറാ ടെയ്ലർ എന്നിവരെയാണ് ഐസിസി പുതുതായി ഉൾപ്പെടുത്തിയത്.

ഐ.സി.സി ഹാൾ ഓഫ് ഫെയിമിൽ തന്റെ പേര് ഉൾപ്പെടുത്തിയത് മഹത്തരമായ ബഹുമതിയാണെന്ന് ധോണി പ്രതികരിച്ചു. ‘വിവിധ തലമുറകളിലായി ലോകമെമ്പാടുമുള്ള ക്രിക്കറ്റ് കളിക്കാരുടെ സംഭാവനകളെ അംഗീകരിക്കുന്ന വേദിയാണത്. എക്കാലത്തെയും മികച്ച താരങ്ങൾക്കൊപ്പം നിങ്ങളുടെ പേരും ഓർമിക്കപ്പെടുന്നത് ഒരു അതിശയകരമായ അനുഭവമാണ്. മനസ്സിൽ എക്കാലവും അഭിമാനത്തോടെ കൊണ്ടുനടക്കാവുന്ന ഒന്നാണിത്’, ധോണി പറഞ്ഞു.

ഇന്ത്യയെ ഐസിസിയുടെ പ്രധാനപ്പെട്ട മൂന്ന് ടൂർണമെന്റുകളിലും കിരീടനേട്ടത്തിൽ എത്തിച്ച ക്യാപ്റ്റനാണ് ധോണി. എംഎസ്ഡിയുടെ ക്യാപ്റ്റൻസിയിൽ ഏകദിന ലോകകപ്പ്, ടി20 ലോകകപ്പ്, ചാമ്പ്യൻസ് ട്രോഫി എന്നീ കിരീടങ്ങൾ ഇന്ത്യ നേടി. അന്താരാഷ്ട്ര ക്രിക്കറ്റിൽ വിവിധ ഫോർമാറ്റുകളിലായി 17,266 റൺസും, 829 പുറത്താക്കലുകളും ധോണിയുടെ പേരിലുണ്ട്.