ഐപിഎല്‍ കരിയറിലെ തന്റെ ആദ്യ കിരീടം ലക്ഷ്യം വച്ച് ഇന്ന് ആര്‍സിബിക്കായി ഇറങ്ങുകയാണ് വിരാട് കോഹ്ലി. മൂന്ന് തവണയാണ് കയ്യെത്തുംദൂരത്ത് വച്ച് ആര്‍സിബിക്ക് കിരീടം നേടാനാവാതെ പോയത്. ഐപിഎല്‍ കിരീടം ആര്‍സിബി ആരാധകര്‍ ഒന്നടങ്കം വര്‍ഷങ്ങളായി കാത്തിരിക്കുന്ന കാര്യമാണ്. ഇത് ഇന്നെങ്കിലും പഞ്ചാബിനെ തോല്‍പ്പിച്ച് ടീമിന് നേടാനാവാന്‍ സാധിക്കട്ടെയെന്നാണ് അവര്‍ പ്രാര്‍ത്ഥിക്കുന്നത്. ആര്‍സിബിക്കായി ഈ സീസണില്‍ ശ്രദ്ധേയ പ്രകടനമാണ് വിരാട് കോഹ്ലി കാഴ്ചവച്ചത്. ഈ സീസണില്‍ 14 മത്സരങ്ങളില്‍ നിന്നായി 614 റണ്‍സാണ് കോഹ്ലി നേടിയത്.
ഐപിഎലിന് ശേഷം വിരാട് കോഹ്ലിയെ ഇനി എപ്പോഴാണ് ക്രിക്കറ്റില്‍ കാണാന്‍ സാധിക്കുകയെന്നാണ് ആരാധകര്‍ ഉറ്റുനോക്കുന്നത്. അന്താരാഷ്ട്ര ക്രിക്കറ്റില്‍ ടി20, ടെസ്റ്റ് ഫോര്‍മാറ്റുകളില്‍ നിന്നും കോഹ്ലി വിരമിച്ചിരുന്നു. ഇനി ഏകദിന മത്സരങ്ങളില്‍ മാത്രമാണ് താരം കളിക്കുക. 2027ലെ ഏകദിന ലോകകപ്പ് വരെ താരം തുടരുമെന്നാണ് റിപ്പോര്‍ട്ടുകള്‍. അതേസമയം ഓസ്‌ട്രേലിയന്‍ ടി20 ലീഗായ ബിഗ് ബാഷ് ലീഗില്‍ കോഹ്ലി കളിക്കുന്നത് കാണാന്‍ കാത്തിരിക്കുകയാണെന്ന് പറയുകയാണ് ക്രിക്കറ്റ് ഓസ്‌ട്രേലിയ സിഇഒ ടോഡ് ഗ്രീന്‍ബെര്‍ഗ്.
Read more
ഇന്ത്യന്‍ താരങ്ങളെ ബിബിഎലില്‍ കളിക്കാന്‍ അനുവദിക്കണമെന്ന് ആവശ്യപ്പെട്ട് ബിസിസിഐയുമായി ക്രിക്കറ്റ് ഓസ്‌ട്രേലിയ ചര്‍ച്ചകളിലാണെന്നും അദ്ദേഹം അറിയിച്ചു. വിദേശ ലീഗുകളില്‍ കളിക്കുന്നതിന് നിലവില്‍ ഇന്ത്യന്‍ താരങ്ങള്‍ക്ക് ബിസിസിഐ നിയന്ത്രണം ഏര്‍പ്പെടുത്തിയിട്ടുണ്ട്. എന്നാല്‍ ഇത് വനിത ക്രിക്കറ്റ് താരങ്ങള്‍ക്ക് ബാധകമല്ല. ഹര്‍മന്‍പ്രീത് കൗര്‍, ജെമീമ റോഡ്രിഗസ്, സ്മൃതി മന്ദാന എന്നീ താരങ്ങള്‍ ബിബിഎലില്‍ കളിക്കുന്നുണ്ട്. വിരാട് കോഹ്ലി ബിബിഎലില്‍ എത്തിയാല്‍ കളി കാണാന്‍ ആളുകള്‍ കുടൂമെന്നും ടിആര്‍പി റേറ്റിങ് കൂടുമെന്നും ടോഡ് ഗ്രീന്‍ബെര്‍ഗ് പറഞ്ഞു.
