വനിതാ ടി20 ലോകകപ്പ് എഷ്യ ക്വാളിഫയറില്‍ യുഎഇയും ഖത്തറും തമ്മില്‍ നടന്ന മത്സരത്തില്‍ നാടകീയ സംഭവ വികാസങ്ങള്‍. യുഎഇ വനിത ടീമിലെ പത്ത് കളിക്കാരാണ് മത്സരത്തില്‍ റിട്ടയേര്‍ഡ് ഔട്ടായത്. ആദ്യ ബാറ്റിങ്ങില്‍ വിക്കറ്റ് നഷ്ടമില്ലാതെ 192 റണ്‍സാണ് യുഎഇ നേടിയിരുന്നത്. ഓപ്പണിങ് ബാറ്റര്‍മാരായ ഇഷ ഒസയും തീര്‍ത്ഥ സതീഷും ചേര്‍ന്ന്‌ മികച്ച തുടക്കമാണ്‌ യുഎഇയ്ക്ക് നല്‍കിയത്. 16 ഓവറില്‍ മികച്ച സ്‌കോര്‍ നേടിയതോടെ യുഎഇ ടീമിലെ പത്ത് കളിക്കാരും റിട്ടയേര്‍ഡ് ഔട്ടാവുകയായിരുന്നു.

മത്സരത്തില്‍ മഴ മുന്നറിയിപ്പ് നേരത്തെ ലഭിച്ചതോടെയാണ് യുഎഇ വനിത ടീം ഇങ്ങനെയൊരു തന്ത്രപരമായ നീക്കം മത്സരത്തില്‍ നടത്തിയത്. ടി20 ലോകകപ്പ് യോഗ്യത മത്സരത്തില്‍ മികച്ച റണ്‍റേറ്റ് ലഭിക്കുന്നതിന് വേണ്ടിയായിരുന്നു യുഎഇ ടീമിന്റെ ഈ നീക്കം. ബാങ്കോക്കില്‍ വച്ചായിരുന്നു മത്സരം. മറുപടി ബാറ്റിങ്ങില്‍ 11.1 ഓവറില്‍ വെറും 29 റണ്‍സിനാണ് ഖത്തര്‍ ഓള്‍ഔട്ടായത്. 163 റണ്‍സ് ജയമാണ് മത്സരത്തില്‍ യുഎഇ നേടിയത്.

വമ്പന്‍ വിജയത്തിന് പിന്നാലെ അവര്‍ക്ക് മികച്ച റണ്‍റേറ്റ് ടി20 ലോകകപ്പ് യോഗ്യത മത്സരത്തില്‍ ലഭിക്കുകയും ചെയ്തു. ക്രിക്കറ്റ് ചരിത്രത്തിലെ പുതിയൊരു റെക്കോഡ് കൂടിയാണ് ഈ മത്സരത്തോടെ യുഎഇ വനിത ടീം സ്വന്തം പേരില്‍ കുറിച്ചത്. തുടര്‍ച്ചയായ രണ്ട് വിജയത്തോടെ നിലവില്‍ ബി ഗ്രൂപ്പില്‍ ഒന്നാമതാണ് യുഎഇ. മലേഷ്യ, ഖത്തര്‍ തുടങ്ങിയവരാണ് ഈ ഗ്രൂപ്പിലുളള മറ്റു ടീമുകള്‍.