ഹോര്മുസ് കടലിടുക്കില് ഇന്ത്യയിലേക്ക് വരികയായിരുന്ന തായ് ചരക്ക് കപ്പലിന് നേരെ ആക്രമണമുണ്ടായി. ഇറാന്റെ നിയന്ത്രണത്തിലുള്ള ഹോര്മുസ് കടലിടുക്കില് മൂന്ന് കപ്പലുകള്ക്ക് നേരെയാണ് ഇന്ന് ആക്രമണമുണ്ടായി. കപ്പലുകളില് പ്രൊജക്ടൈലുകള് പതിച്ചതായി സമുദ്രസുരക്ഷാ ഏജന്സികള് അറിയിച്ചു. ഇന്ത്യയിലേക്ക് വരികയായിരുന്ന തായ് ചരക്ക് കപ്പലിന് നേരെയുണ്ടായ ആക്രമണത്തില് കപ്പലിന് തീപിടിച്ചു.
ഹോര്മുസ് കടലിടുക്കിലൂടെ സഞ്ചരിക്കുന്നതിനിടെ തായ് പതാകയുള്ള ചരക്ക് കപ്പല് ആക്രമിക്കപ്പെട്ടതിനെത്തുടര്ന്ന് അടിയന്തര സഹായം നല്കുന്നതായി തായ്ലന്ഡ് നാവികസേന അറിയിച്ചു. 23 തായ് ജീവനക്കാര് കപ്പലിലുണ്ടായിരുന്നതായും അവര് വ്യക്തമാക്കി. ഒമാന് നാവികസേന 20 ജീവനക്കാരെ രക്ഷപ്പെടുത്തിയതായും ബാക്കിയുള്ള മൂന്ന് പേരെ ‘രക്ഷിക്കാനുള്ള ശ്രമത്തിലാണെന്നും’ തായ് അധികൃതര് പറയുന്നു. യുഎഇ തുറമുഖത്ത് നിന്ന് പുറപ്പെട്ട ഈ കപ്പല് ഗുജറാത്തിലെ കാണ്ട്ല തുറമുഖത്തേക്ക് വരികയായിരുന്നുവെന്ന് എഎഫ്പി വാര്ത്താ ഏജന്സി റിപ്പോര്ട്ട് ചെയ്യുന്നു. തായ് കമ്പനിയായ പ്രെഷ്യസ് ഷിപ്പിംഗ് പിസിഎല്ലിന്റെ ഉടമസ്ഥതയിലുള്ള ബള്ക്ക് കാരിയറായ മയൂരി നരീ എന്ന കപ്പല് യുഎഇയിലെ ഖലീഫ തുറമുഖത്ത് നിന്ന് പുറപ്പെട്ട് ഇന്ത്യയിലെ കാണ്ട്ല തുറമുഖത്തേക്ക് പോകവെയാണ് ആക്രമിക്കപ്പെട്ടത്.
ബുധനാഴ്ച യുണൈറ്റഡ് അറബ് എമിറേറ്റ്സിലെ തുറമുഖം വിട്ടതിന് തൊട്ടുപിന്നാലെ ഹോര്മുസ് കടലിടുക്കിന് സമീപമാണ് തായ് പതാക വഹിച്ച ചരക്ക് കപ്പല് ആക്രമിക്കപ്പെട്ടതായി റോയല് തായ് നേവി അറിയിച്ചിരുക്കുന്നത്. യുഎസുമായും ഇസ്രയേലുമായും യുദ്ധത്തിലേര്പ്പെട്ടിരിക്കുന്ന ഇറാന് ഹോര്മുസില് നിയന്ത്രണമേര്പ്പെടുത്തിയിരിക്കെയാണ് ആക്രണങ്ങള്. ഹോര്മൂസിലൂടെ പോകുന്ന കപ്പലുകളെ ആക്രമിക്കുമെന്ന് ഇറാന് നേരത്തെ വ്യക്തമാക്കിയിരുന്നു. ചില രാജ്യങ്ങള്ക്ക് മാത്രം ഇളവും പ്രഖ്യാപിച്ചിരുന്നു.
Read more
തായ്ലന്ഡ് നാവികസേന ആക്രമണം നടന്ന കപ്പലിന്റെ ചിത്രങ്ങളും പുറത്ത് വിട്ടിട്ടുണ്ട്. കപ്പലിന് കേടുപാടുകള് സംഭവിച്ചതിന്റെയും പുക ഉയരുന്നതിന്റെ ചിത്രങ്ങളാണിത്. കപ്പലിന് 178 മീറ്റര് നീളവും 30,000 ടണ് ഭാരംവഹിക്കാനുള്ള ശേഷിയും ഉണ്ടെന്ന് തായ് നാവികസേന അറിയിച്ചു. തായ് കമ്പനിയുടെ ഉടമസ്ഥതയിലുള്ള ബള്ക്ക് കാരിയറായ മയൂരി നരീ എന്ന കപ്പല് ഇന്ത്യയിലെ കാണ്ട്ല തുറമുഖത്തേക്ക് പോകുമ്പോഴാണ് ആക്രമണത്തിനിരയായത്. തായ് നാവികസേന പുറത്തുവിട്ട ഫോട്ടോകളില് കപ്പലിന്റെ പുറംചട്ടയില് നിന്നും സൂപ്പര്സ്ട്രക്ചറില് നിന്നും കറുത്ത പുക ഉയരുന്നത് കാണുന്നുണ്ട്.
