വിഴിഞ്ഞം അന്താരാഷ്ട്ര തുറമുഖത്തേക്ക് രണ്ടാമത്തെ് ക്രെയിനുകളുമായി കപ്പല്‍ ചൈനയില്‍നിന്ന് പുറപ്പെട്ടു. ഷെന്‍ഹുവ- 29 എന്ന കപ്പല്‍ കഴിഞ്ഞ ദിവസം ഷാങ്ഹായ് തുറമുഖത്തു നിന്നാണ് യാത്ര ആരംഭിച്ചത്. വിഴിഞ്ഞം തുറമുഖത്തേക്കുള്ള ആറ് യാര്‍ഡ് ക്രെയിനുകളാണ് കപ്പലില്‍ ഉള്ളത്. നവംബര്‍ ഒമ്പതിന് കപ്പല്‍ തുറമുഖത്തെത്തുമെന്നാണ് പ്രതീക്ഷ.
വിഴിഞ്ഞത്ത് ആദ്യം എത്തിയ ഷെന്‍ഹുവ- 15ലെ മൂന്ന് ക്രെയ്നുകളിലെ അവസാനത്തെ ക്രെയ്ന്‍ ഇന്നലെ കപ്പലില്‍നിന്ന് ഇറക്കി. കൂട്ടത്തിലെ വലിയ, 100 മീറ്റര്‍ ഉയരമുള്ള ഷിപ്പ് ടു ഷോര്‍ ക്രെയ്നും ഇറക്കിയതോടെ ‘ഷെന്‍ഹുവ- 15’ ഇന്നു ചൈനയിലേക്ക് മടങ്ങും. കഴിഞ്ഞ 12നാണ് ആദ്യകപ്പല്‍ തിരുവനന്തപുരത്ത് എത്തിയത്.
Read more
തുറമുഖത്തിന്റെ ആദ്യഘട്ടത്തില്‍ എട്ട് ഷിപ്പ് ടു ഷോര്‍ ക്രെയിനും 24 യാര്‍ഡ് ക്രെയിനുമാണ് വേണ്ടത്. നവംബര്‍ അവസാനവും ഡിസംബര്‍ ആദ്യവാരവുമായി രണ്ടു കപ്പല്‍കൂടി ക്രെയിനുമായി വിഴിഞ്ഞത്ത് എത്തും. ഇതോടെ തുറമുഖത്തിന്റെ എണ്‍പത് ശതമാനം ജോലികളും പൂര്‍ത്തിയാവുമെന്ന് അധികൃതര്‍ വ്യക്തമാക്കി.
