ജാര്ഖണ്ഡില് നിന്നും തൊഴിലാളികളെ കൊണ്ടുവരാന് പോയ മലയാളികളെ ഗ്രാമവാസികള് ബന്ദികളാക്കി. ഇടുക്കി കൊച്ചറ സ്വദേശി അനീഷ്, മേരികുളം സ്വദേശി ഷാജി എന്നിവരെയാണ് ബന്ദികളാക്കിയത്. കേരള പൊലീസ് ആവശ്യപ്പെട്ടതനുസരിച്ച് ജാര്ഖണ്ഡ് പൊലീസ് മലയാളികളെ രക്ഷപ്പെടുത്തി. എന്നാല്, ബസ് ഗ്രാമത്തില് തന്നെ പിടിച്ചുവെച്ചിരിക്കുകയാണ്.
ഈ മാസം പത്തിനാണ് ഇവര് ജാര്ഖണ്ഡിലേക്ക് പോയത്. തൊഴിലാളികളുമായാണ് ബസ് പോയത്. ശേഷം തൊഴിലാളികളെയും കൂട്ടി തിരിച്ചുവരാനായിരുന്നു പദ്ധതി. ഇന്നലെ ജാര്ഖണ്ഡിലെ ഒരു ഗ്രാമത്തില് നിന്നും ഇവര്ക്ക് വിളിവന്നു. കേരളത്തിലേക്ക് വരാനായി 15ഓളം പേര് തയ്യാറാണെന്ന് പറഞ്ഞായിരുന്നു കോള്. ഇതനുസരിച്ച് ഇവര് തൊഴിലാളികളെ കൂട്ടാനായി ഗ്രാമത്തിലേക്ക് ചെന്നപ്പോഴാണ് ഗ്രാമത്തിലുള്ളവര് ഇവരെ ബന്ദിയാക്കിയത്.
മുമ്പ് കേരളത്തിലേക്ക് ജോലിക്കു വന്നവര്ക്ക് ശമ്പളക്കുടിശ്ശിക ഉണ്ടെന്ന് പറഞ്ഞാണ് ഇവരെ ഗ്രാമവാസികള് ബസിനുള്ളില് പൂട്ടിയിട്ടത്. അതുകൊണ്ടുതന്നെ രണ്ട് ലക്ഷം രൂപ തന്നാല് മാത്രമേ മോചിപ്പിക്കൂ എന്നും അറിയിക്കുകയായിരുന്നു. കൂടെയുണ്ടായിരുന്നവര് പൊലീസിനെ അറിയിച്ചെങ്കിലും ഫലമുണ്ടായില്ല. പിന്നീട് കേരള പൊലീസ് ജാര്ഖണ്ഡ് പൊലീസുമായി ബന്ധപ്പെട്ടതോടെ പൊലീസെത്തി ഇവരെ മോചിപ്പിക്കുകയായിരുന്നു.
Read more
എന്നാല് ബസ് വിട്ടുകൊടുക്കാന് ഗ്രാമവാസികള് തയ്യാറായിട്ടില്ല. കുടിശ്ശിക കിട്ടിയാല് മാത്രമേ ബസ് വിട്ടുകൊടുക്കൂവെന്നാണ് ഗ്രാമവാസികള് പറയുന്നത്. എന്നാല്, തമിഴ്നാട്ടിലെ ഏതോ കമ്പനിയാണ് തൊഴിലാളികളെ കബളിപ്പിച്ചതെന്നും തങ്ങള്ക്ക് ബന്ധമില്ലെന്നും മോചിപ്പിക്കപ്പെട്ട അനീഷ് പറഞ്ഞു.