അഴിമതി തടയേണ്ട എന്ഫോഴ്സ്മെന്റ് ഡയറക്ടറേറ്റ് തന്നെ അഴിമതിക്കാരാണെന്ന് വ്യക്തമാകുന്ന തെളിവുകളാണ് ഇപ്പോള്‍ പുറത്തുവന്നതെന്ന് സിപിഎം ജനറല്‍ സെക്രട്ടറി എം എ ബേബി. ചങ്ങലയ്ക്ക് ഭ്രാന്ത് പിടിക്കുക, വേലി തന്നെ വിളവ് തിന്നുക എന്ന് പറയുന്നതുപോലെയുള്ള സ്ഥിതി വിശേഷമാണ് ഇപ്പോള്‍ ഉണ്ടായിരിക്കുന്നതെന്നും അദ്ദേഹം പറഞ്ഞു.
ഇ ഡിയെ രാഷ്ട്രീയമായി ഒരുപാട് കാലമായി ദുരുപയോഗപ്പെടുത്തി കൊണ്ടിരിക്കുയാണ്. ആ രാഷ്ട്രീയ ദുരപയോഗപ്പെടുത്തലിനെ കുറിച്ച് എല്ലാവരും ഉന്നയിച്ചിരുന്നു. ഇപ്പോള്‍ അഴിമതി തടയാന്‍ കൂടി ഉദ്ദേശിക്കപ്പെട്ടിട്ടുള്ള ഇഡി തന്നെ അഴിമതിക്കാരാണെന്ന് വ്യക്തമാകുന്ന തെളിവുകളാണ് പുറത്തുന്നത്. എന്തായാലും അതിന്റെ അന്വേഷണം പുരോഗമിക്കട്ടെ. കൂടുതല്‍ വസ്തുതകള്‍ പുറത്തുവരട്ടെയെന്നും ബേബി പറഞ്ഞു.
അഴിമതി കേസില്‍ എന്ഫോഴ്സ്മെന്റ് ഡയറക്ടറേറ്റ്( ഇ ഡി) കൊച്ചി യൂണിറ്റ് മുന്‍ ഉദ്യോസ്ഥര്‍ക്ക് പങ്കുണ്ടോ എന്ന് വിജിലന്‍സ് പരിശോധിക്കുകയാണ്. വിരമിച്ചവരുടെയും മറ്റു യൂണിറ്റുകളിലേക്ക് സ്ഥലം മാറിയവരുടെയും പങ്കാണ് അന്വേഷിക്കുക. ഇതിനായി അറസ്റ്റിലായവരില്‍ നിന്ന് വീണ്ടും മൊഴിയെടുക്കാനാണ് വിജിലന്‍സ് തീരുമാനം. ഇതോടൊപ്പം പ്രതികളുടെ ഫോണ്‍ രേഖകളും വിശദമായി പരിശോധിക്കുന്നുണ്ട്.
Read more
