രോഗിയുടെ ബന്ധുക്കളും നാട്ടുകാരും ചേര്ന്ന് ഡോക്ടര്മാരെ തല്ലുന്നത് നല്ല കാര്യമല്ലെങ്കിലും ചില ഡോക്ടര്മാര്ക്ക് അത് കൊള്ളേണ്ടതാണെന്ന് കെ ബി ഗണേഷ് കുമാര് എംഎല്എ. നിയമസഭയില് ആരോഗ്യവകുപ്പിന്റെ ധനാഭ്യര്ത്ഥന ചര്ച്ചയില് പ്രസംഗിക്കുകയായിരുന്നു എംഎല്എ.
തന്റെ മണ്ഡലത്തിലെ ഒരു സ്ത്രീയെ ശസ്ത്രക്രിയ നടത്തിയയപ്പോള് വരുത്തിയ പിഴവ് ചൂണ്ടികാട്ടിയാണ് കെ ബി ഗണേഷ് കുമാര് ഇക്കാര്യം സൂചിപ്പിച്ചത്. വിധവയായ സ്ത്രീയെ ഡിസംബര് 17 ന് തിരുവനന്തപുരം മെഡിക്കല് കോളേജ് ആശുപത്രിയില് ശസ്ത്രക്രിയക്ക് വിധേയമാക്കിയിരുന്നു. അവരുടെ വയറ് അലമാര തുറന്നത് പോലെ വെട്ടി പൊളിച്ചേക്കുവാണ്. ഇതുവരെ സ്റ്റിച്ച് ചെയ്തിട്ടില്ല. ഇക്കാര്യം താന് മന്ത്രി വീണാ ജോര്ജിനെ അറിയിച്ചു.
മെഡിക്കല് കോളേജ് സൂപ്രണ്ട് ഉടന് പുനലൂര് താലൂക്കാശുപത്രിയില് വിളിച്ചു രോഗിയെ എത്തിക്കാന് പറഞ്ഞു. എന്നാല് ആ സ്ത്രീയെ അഡ്മിറ്റ് ചെയ്യാന് ജനറല് സര്ജറി വിഭാഗം മേധാവി 2000 രൂപ വാങ്ങി. വിജിലന്സ് അന്വേഷണം നടത്തിയാല് താന് തെളിവുകള് കൊടുക്കാമെന്നും ഗണേഷ് കുമാര് സഭയില് വ്യക്തമാക്കി.
Read more
അതേസമയം ശസ്ത്രക്രിയയ്ക്കു ശേഷം വയറില് സ്റ്റിച്ച് ഇടാത്ത സംഭവത്തെക്കുറിച്ച് അന്വേഷിക്കുമെന്ന് മന്ത്രി വീണാ ജോര്ജ് പറഞ്ഞു. രോഗികളില്നിന്ന് ഇടനിലക്കാര് വഴിയോ അല്ലാതെയോ കൈക്കൂലി വാങ്ങുന്നവര്ക്കെതിരെ കര്ശന നടപടിയുണ്ടാകുമെന്നും ആരോഗ്യമന്ത്രി പറഞ്ഞു.
