പതിവുപോലെ കുറെ കമ്മ്യൂണിസ്റ്റുകാരും കോണ്ഗ്രസുകാരും ന്യൂനപക്ഷങ്ങളും ചേര്ന്ന് ബിജെപിയെ തോല്പ്പിച്ചു എന്ന് സംവിധായകനും ബിജെപി നേതാവുമായ രാജസേനന്. അഞ്ച് മണ്ഡലങ്ങളിലേക്കു നടന്ന ഉപതിരഞ്ഞെടുപ്പില് എല്ഡിഎഫും യുഡിഎഫും ജയിച്ചത് മലയാളി വീണ്ടും ചെയ്ത കൈയബദ്ധമാണെന്നും ഫെയ്സ്ബുക്കില് പങ്കുവെച്ച വീഡിയോയില് അദ്ദേഹം പറഞ്ഞു.
“പതിവുപോലെ കുറേ കമ്മ്യൂണിസ്റ്റുകാരും കോണ്ഗ്രസുകാരും ന്യൂനപക്ഷങ്ങളും ചേര്ന്ന് ബി.ജെ.പിയെ തോല്പ്പിച്ചു. പക്ഷേ, ബി.ജെ.പി തോറ്റിട്ടില്ല എന്നും, എങ്ങും തോല്ക്കത്തില്ല എന്നും മഹാരാഷ്ട്രയിലെയും ഹരിയാനയിലെയും തിരഞ്ഞെടുപ്പ് ഫലം കാണുമ്പോള് ഏത് മലയാളിക്കും മനസ്സിലാകും. പക്ഷേ, മനസ്സിലാകാത്തതു പോലെ നടിച്ചു കൊണ്ട്, അല്ലെങ്കില് മനസ്സിലാകാത്തതു കൊണ്ട് വീണ്ടും ചെയ്ത ഒരു കൈയബദ്ധം എന്നു കരുതിയാല് മതി മൂന്ന് സീറ്റുകളിലെ യു.ഡി.എഫിന്റെ വിജയവും രണ്ട് സീറ്റിലെ എല്.ഡി.എഫിന്റെ വിജയവും.” രാജസേനന് പറഞ്ഞു.
“സുരേന്ദ്രനെയും പ്രകാശ് ബാബുവിനെയും തോല്പ്പിച്ചപ്പോള് ആര്ക്കൊക്കെയോ സന്തോഷം തോന്നിക്കാണും. പക്ഷേ എന്റെ ന്യൂനപക്ഷ സുഹൃത്തുക്കളോട് ഞാന് പറയുന്നു, കേരളത്തില് ന്യൂനക്ഷവും ബിജെപിയും ഒന്നിച്ചു ഭരിക്കുന്ന കാലം അധികം വൈകാതെ വരും. രാജ്യം മുഴുവന് ബി.ജെ.പിയുടെയും ആര്.എസ്.എസിന്റെയും വേരുകള് പടര്ന്നു പന്തലിച്ചു കഴിഞ്ഞു. അതിനാല് കേരളത്തിലും അത് സംഭവിക്കും. ഇത് ഒരു ബിജെപിക്കാരന്റെ മാത്രം വാക്കുകളല്ല, ഒരു കലാകാരന്റെ ദീര്ഘവീക്ഷണമുള്ള വാക്കുകളാണ്. ഇത് സംഭവിക്കും, സംഭവിച്ചേ പറ്റൂ. നമുക്ക് കാത്തിരിക്കാം”. രാജസേനന് വീഡിയോയില് പറഞ്ഞു.