സിനിമാനടന്‍ ദിലീപിന്റെ പരാതിയില്‍ അഭിനേതാക്കളായ പാര്‍വതി തിരുവോത്ത്, റിമ കല്ലിങ്കല്‍, രേവതി, രമ്യാ നമ്പീശന്‍, സംവിധായകന്‍ ആഷിഖ് അബു എന്നിവര്‍ക്ക് കോടതി നോട്ടീസ്. നടിയെ ആക്രമിച്ച കേസിലെ സാക്ഷികള്‍ക്കെതിരായി സമൂഹ മാധ്യമങ്ങളിലൂടെ പ്രസ്താവന നടത്തിയെന്ന് ആരോപിച്ച് ദിലീപ് നല്‍കിയ പരാതിയിലാണ് നോട്ടീസ് എന്നാണ് റിപ്പോർട്ട്.
നടി ആക്രമിക്കപ്പെട്ട കേസുമായി ബന്ധപ്പെട്ട് അഭിനേതാക്കളായ സിദ്ദിഖ്, ഭാമ എന്നിവര്‍ ഏതാനും ദിവസങ്ങൾക്ക് മുമ്പ് കോടതിയിൽ കൂറു മാറിയതിനെ ചലച്ചിത്ര പ്രവർത്തകർക്കിടയിലെ ഒരു വിഭാഗം ആളുകൾ വിമര്‍ശിച്ചിരുന്നു.
Read more
നടിക്ക് ഒപ്പം നില്‍ക്കേണ്ടവര്‍ ചതിച്ചെന്നും ഇത് ലജ്ജാവഹമാണെന്നും ചൂണ്ടിക്കാട്ടി വനിതാ ചലച്ചിത്ര പ്രവർത്തകരുടെ കൂട്ടായ്മയായ ഡബ്ലിയുസിസി അംഗങ്ങളും രംഗത്തെത്തി. നടിമാരായ പാര്‍വ്വതി, രേവതി, രമ്യ നമ്പീശന്‍, റിമ കല്ലിങ്കല്‍ എന്നിവര്‍ക്കൊപ്പം സംവിധായകന്‍ ആഷിഖ് അബുവും സാമൂഹിക മാധ്യമങ്ങളിലൂടെ വിമര്‍ശനമുന്നയിച്ചിരുന്നു.
