കാറില്‍ ചാരി നിന്നതിന് ചവിട്ടേറ്റ ആറു വയസ്സുകാരന്‍ ഗണേഷിന്റെ വാരിയെല്ലിലെ എല്ലുകള്‍ക്ക് ചതവുണ്ടെന്ന് എക്‌സ്‌റേ പരിശോധന ഫലം. കാറില്‍ വന്നയാള്‍ തന്നെ മര്‍ദ്ദിക്കുകയായിരുന്നു എന്ന് തലശ്ശേരി ജനറല്‍ ആശുപത്രിയില്‍ ചികിത്സയിലുള്ള കുഞ്ഞ് മാധ്യമങ്ങളോട് പറഞ്ഞു.
മര്‍ദ്ദിച്ചത് കണ്ടു എന്ന് രക്ഷിതാക്കളും പറയുന്നുണ്ട്. ആരോഗ്യപരമായി വലിയ പ്രശ്‌നങ്ങളൊന്നുമില്ലാത്ത അവസ്ഥയിലാണ് കുഞ്ഞ്. ഉടന്‍ തന്നെ സുഖം പ്രാപിക്കുമെന്നാണ് ഡോക്ടര്‍മാര്‍ പറയുന്നത്.
കുട്ടിയെ ഉപദ്രവിച്ച പ്രതി ശിഹ്ഷാദിനെ(20) അറസ്റ്റ് ചെയ്ത് വധശ്രമത്തിന് കേസെടുത്തിട്ടുണ്ട്. ശിഹ്ഷാദ് വണ്ടി നിര്‍ത്തിയ സമയം രാജസ്ഥാന്‍ സ്വദേശികളുടെ മകനായ ഗണേഷ് എന്ന ആറുവയസുകാരന്‍ കാറിന് സൈഡില്‍ ചാരിനിന്നു. ഇത് കണ്ടുവന്ന ശിഹ്ഷാദ് കുട്ടിയെ ചവിട്ടുകയായിരുന്നു.
Read more
കുട്ടിയെ ആക്രമിക്കുന്നത് കണ്ട നാട്ടുകാര്‍ ഇയാളെ ചോദ്യം ചെയ്തു. കാറിനുള്ളിലുണ്ടായിരുന്ന കുടുംബാംഗങ്ങളെ കുട്ടി ഉപദ്രവിക്കാന്‍ ശ്രമിച്ചെന്ന വിചിത്ര ന്യായമാണ് ഇയാള്‍ ഉന്നയിച്ചത്. പിന്നീട് മണിക്കൂറുകള്‍ക്ക് ശേഷമാണ് ഇയാളെ വിളിച്ച് വരുത്തി കാര്യം തിരക്കുകയും കാര്‍ കസ്റ്റഡിയിലെടുക്കുകയും ചെയ്തത്. സിസിടിവി ദൃശ്യങ്ങള്‍ വൈറലായതോടെയാണ് നടപടിയ്ക്ക് പൊലീസ് തയ്യാറായത്.
