നടിയെ ആക്രമിച്ച കേസില് ഗൂഢാലോചനകുറ്റം ആരോപിക്കപ്പെട്ട എട്ടാം പ്രതി ദിലീപിനെ കുറ്റവിമുക്തനാക്കിയ വിചാരണക്കോടതി വിധി ചോര്ന്നതായി ഹൈക്കോടതി അഭിഭാഷക അസോസിയേഷന് പ്രസിഡന്റ് അഡ്വ. യശ്വന്ത് ഷേണായി. വിശദമായ അന്വേഷണം വേണമെന്ന് ആവശ്യപ്പെട്ട് യശ്വന്ത് ഷേണായി ഹൈക്കോടതി ചീഫ് ജസ്റ്റിസിന് കത്ത് നല്കി. കേസിന്റെ വിധി വരുന്നതിന് ഏകദേശം ഒരാഴ്ച മുമ്പ് സംഘടനയ്ക്ക് ഊമക്കത്ത് ലഭിച്ചുവെന്നും കത്തിലെ വിവരങ്ങള് വിധിയുമായി സാമ്യമുള്ളതാണെന്നും അഭിഭാഷക അസോസിയേഷന് പ്രസിഡന്റ് വ്യക്തമാക്കുന്നു.
ദിലീപ് കുറ്റവിമുക്തനാക്കപ്പെടുമെന്ന സന്ദേശം ഡിസംബര് രണ്ടിന് തനിക്ക് ലഭിച്ചുവെന്നാണ് അഭിഭാഷക അസോസിയേഷന് പ്രസിഡന്റ് അഡ്വ. യശ്വന്ത് ഷേണായിയുടെ പരാതിയില് പറയുന്നത്. ഡിസംബര് എട്ടിനാണ് നടിയെ ആക്രമിച്ച കേസില് വിധി പ്രസ്താവിച്ചത്. ഇത് സംബന്ധിച്ച് വിശദമായ അന്വേഷണം വേണമെന്നും ആവശ്യപ്പെട്ട് യശ്വന്ത് ഷേണായി ഹൈക്കോടതി ചീഫ് ജസ്റ്റിസിന് കത്ത് നല്കി. ഊമക്കത്തിന്റെ പകര്പ്പ് അടക്കമാണ് അഭിഭാഷക അസോസിയേഷന് പ്രസിഡന്റിന്റെ പരാതി.
അഭിഭാഷക അസോസിയേഷന് പ്രസിഡന്റ് അഡ്വ. യശ്വന്ത് ഷേണായി
ഒന്നാംപ്രതി പള്സര് സുനി അടക്കം ആറുപേരെ കുറ്റക്കാരായി പ്രസ്താവിച്ച വിധിയുടെ ഉള്ളടക്കം വിധി പ്രഖ്യാപിക്കും മുമ്പ് ഊമക്കത്ത് ആയി ലഭിച്ചെന്നാണ് പരാതി. ഡിസംബര് 8 ന് വിധി പറയുന്ന കേസില് ഏഴാം പ്രതി ചാര്ളി തോമസ്, എട്ടാം പ്രതി ദിലീപ്, ഒമ്പതാം പ്രതി സനില് കുമാര് എന്നിവരെ ഒഴിവാക്കുമെന്നും ഊമക്കത്തില് പറയുന്നുവെന്നാണ് പുറത്തുവരുന്ന വിവരം. വിധി ചോര്ന്നോ എന്നും കത്തിന്റെ ഉറവിടം കണ്ടെത്തണമെന്നും ആവശ്യപ്പെട്ട് ജുഡീഷ്യറിയുടെ വിശ്വാസ്യത ഉറപ്പാക്കാന് അന്വേഷണം നടത്തണമെന്നാണ് പരാതിയിലെ പ്രധാന ആവശ്യം.
Read more
ഈ ഊമക്കത്തിന്റെ നിജസ്ഥിതിയും ലക്ഷ്യവും കണ്ടെത്തേണ്ടത് അത്യാവശ്യമാണെന്നും, ഹൈക്കോടതിയുടെ വിജിലന്സ് വിഭാഗം ഇതില് അന്വേഷണം നടത്തണമെന്നുമാണ് അഭിഭാഷക അസോസിയേഷന് ആവശ്യപ്പെടുന്നത്. വിചാരണക്കോടതി ജഡ്ജി ഹണി എം വര്ഗ്ഗീസ് സുഹൃത്തായ ഷേര്ളിയെക്കൊണ്ട് വിധി തയ്യാറാക്കിയെന്നും ദിലീപിന്റെ സുഹൃത്തും പ്രതിയുമായ ശരത്തിനെ കാണിച്ച് കച്ചവടം ഉറപ്പിച്ചുവെന്നും ഊമക്കത്തില് പരാമര്ശിക്കുന്നതായി പരാതിയില് പറയുന്നു. ആക്ഷേപം വിജിലന്സ് രജിസ്ട്രാറോ മറ്റൊരു ഏജന്സിയോ അന്വേഷിക്കണമെന്നും പരാതിയിലൂടെ യശ്വന്ത് ഷേണായി ആവശ്യപ്പെടുന്നു. ഊമക്കത്ത് വിധിയുടെ രഹസ്യാത്മകത തകര്ക്കുന്നതാണെന്നും ജുഡീഷ്യറിയുടെ സല്പ്പേരും അഖണ്ഡതയും തകര്ക്കുന്നതാണെന്നും യശ്വന്ത് ഷേണായി ചൂണ്ടിക്കാട്ടി. ‘ഇന്ത്യന് പൗരന്’ എന്ന പേരിലെഴുതിയ ഈ ഊമക്കത്തും ഹൈക്കോടതി അഭിഭാഷക അസോസിയേഷന് പ്രസിഡന്റ് അഡ്വ. യശ്വന്ത് ഷേണായി ചീഫ് ജസ്റ്റിന് അയച്ച കത്തിനൊപ്പം ചേർത്തിട്ടുണ്ട്.
