വിജയ് സേതുപതിയും നിത്യ മേനോനും പ്രധാന വേഷങ്ങളിൽ എത്തുന്ന തലൈവൻ തലൈവി തിയേറ്ററുകളിൽ മികച്ച പ്രതികരണം നേടി മുന്നേറുകയാണ്. റൊമാന്റിക്ക് കോമഡി വിഭാ​ഗത്തിൽപ്പെടുന്ന സിനിമ പാണ്ഡിരാജ് ആണ് സംവിധാനം ചെയ്തിരിക്കുന്നത്. ജൂലൈ 25ന് തിയേറ്ററുകളിൽ എത്തിയ ചിത്രം തമിഴ്നാട് ബോക്സോഫിസിൽ നിന്ന് റെക്കോഡ് നേട്ടമാണ് സ്വന്തമാക്കിയത്. മൂന്ന് ദിവസങ്ങൾ പിന്നിടുമ്പോൾ തമിഴ്‌നാട്ടിൽ നിന്നും 25 കോടി കലക്ഷൻ നേടിയിരിക്കുകയാണ് തലൈവൻ തലൈവി. റിലീസ് ചെയ്ത മിക്കയിടങ്ങളിലും നിറഞ്ഞ സദസിലാണ് സിനിമ പ്രദർശനം തുടരുന്നത്.

ആദ്യ ദിനം തമിഴ്നാട്ടിൽ നിന്ന് 5.25 കോടിയാണ് സിനിമ നേടിയത്. വിജയ് സേതുപതിയുടെ കരിയറിലെ ഏറ്റവും ഉയർന്ന ആദ്യ ദിന കളക്ഷനാണിത്. മൂന്നാം ദിനം 10 കോടിയോളം നേടാനും സിനിമയ്ക്ക് സാധിച്ചു. മികച്ച ബുക്കിംഗ് ആണ് സിനിമയ്ക്ക് ലഭിക്കുന്നത്. ചിത്രത്തിലെ ഭക്ഷണ രംഗങ്ങളും പ്രേക്ഷകർക്കിടയിൽ ചർച്ചയാകുന്നുണ്ട്. കുടുംബ പശ്ചാത്തലത്തിൽ അണിയിച്ചൊരുക്കിയ സിനിമയിൽ ഭാര്യയും ഭർത്താവുമായിട്ടാണ് വിജയ് സേതുപതിയും നിത്യ മേനോനും എത്തുന്നത്.

തമിഴിലെ പ്രമുഖ ബാനറായ സത്യജ്യോതി ഫിലിംസാണ് നിർമ്മാണം. സന്തോഷ് നാരായണൻ ഒരുക്കിയ സിനിമയിലെ പാട്ടുകൾ നേരത്തെ സോഷ്യൽ മീഡിയയിൽ തരം​ഗമായിരുന്നു. മലയാളത്തിൽ നിന്ന് ചെമ്പൻ വിനോദും ചിത്രത്തിൽ പ്രധാന വേഷത്തിലുണ്ട്. യോഗി ബാബു, ആർ.കെ.സുരേഷ്, ശരവണൻ, ദീപ, ജാനകി സുരേഷ്, റോഷിണി ഹരിപ്രിയൻ, മൈനാ നന്ദിനി എന്നിവർ മറ്റു കഥാപാത്രങ്ങളെ അവതരിപ്പിക്കുന്നു. എം സുകുമാർ ഛായാ​ഗ്രഹണം നിർവഹിക്കുന്ന ചിത്രത്തിന്റെ എഡിറ്റിങ് പ്രദീപ് ഇ രാഘവ് ആണ്. നൃത്തസംവിധാനം ബാബ ഭാസ്കർ, ആക്ഷൻ- കലൈ കിങ്സൺ.