ആസിഫ് അലിക്ക് മമ്മൂട്ടി സമ്മാനിച്ച വാച്ചിന് വില ലക്ഷങ്ങള്‍!

‘റോഷാക്ക്’ സിനിമയുടെ വിജയാഘോഷത്തിന്റെ ഭാഗമായി മമ്മൂട്ടി ആസിഫ് അലിക്ക് സമ്മാനിച്ച റോളക്‌സ് വാച്ച് ആണ് സോഷ്യല്‍ മീഡിയയില്‍ ചര്‍ച്ചയാകുന്നത്. വാച്ചിന്റെ ചിത്രങ്ങള്‍ ആസിഫ് അലി പങ്കുവച്ചതോടെ വാച്ചിന്റെ മോഡലിനെ കുറിച്ചും വിലയെ കുറിച്ചുമുള്ള ചര്‍ച്ചകളാണ് നടക്കുന്നത്.

റോളക്‌സിന്റെ ഡീപ് സീ ഡ്വെല്ലെര്‍ മോഡലില്‍ പെട്ട വാച്ചാണ് ആസിഫ് അലിക്ക് മമ്മൂട്ടി നല്‍കിയത് എന്നാണ് ആരാധകരുടെ കണ്ടെത്തല്‍. 43 എംഎം ഓട്ടോമാറ്റിക് വാച്ച് കൂടിയായ ഇത് പൂര്‍ണമായും വാട്ടര്‍ റസിസ്റ്റന്റ് ആണ്. വാച്ചിന്റെ ഓണ്‍ലൈന്‍ വില പത്ത് ലക്ഷത്തിനടുത്തും മാര്‍ക്കറ്റ് വില പതിനൊന്ന് ലക്ഷം രൂപയുമാണ്.

കഴിഞ്ഞ ദിവസം നടന്ന വിജയാഘോഷത്തിനിടെയാണ് ആസിഫ് അലിയെ ഞെട്ടിച്ചു കൊണ്ട് മമ്മൂട്ടി താരത്തിന് വാച്ച് സമ്മാനിച്ചത്. ‘കമല്‍ഹാസന്‍ സൂര്യയ്ക്ക് റോളക്സ് വാച്ച് നല്‍കിയ വാര്‍ത്ത കണ്ടിരുന്നു. ആ പടത്തിന് 500 കോടിയാണ് കലക്ഷന്‍ കിട്ടിയത്.’

‘അതില്‍ നിന്നും പത്തോ പതിനഞ്ചോ ലക്ഷം കൊടുത്ത് ഒരു വാച്ച് മേടിച്ചു കൊടുത്തു. ഞാന്‍ ചുമ്മാ പറഞ്ഞതാണ് കേട്ടോ. ഭയങ്കര വിലയാകും ആ വാച്ചിന്. ആസിഫ് എന്നോട് ചോദിച്ചത് റോളക്സ് വാച്ച് വാങ്ങിച്ചു തരുമോ എന്നാണ്? റോളക്സ്” എന്ന് പറഞ്ഞതിന് ശേഷമാണ് വേദിയിലേക്ക് മമ്മൂട്ടി വാച്ച് എത്തിച്ചത്.

റോഷാക്കില്‍ ദിലീപ് എന്ന കഥാപാത്രത്തെയാണ് ആസിഫ് അലി അവതരിപ്പിച്ചത്. സിനിമയില്‍ ഉടനീളം മുഖം മൂടി അണിഞ്ഞാണ് താരം വേഷമിട്ടത്. ഈ റോള്‍ ഏറെ പ്രശംസിക്കപ്പെടുകയും ചെയ്തിരുന്നു. നേരത്തെയും റോഷാക്കിലെ ആസിഫലിയുടെ പ്രകടനത്തെ പ്രശംസിച്ച് മമ്മൂട്ടി രംഗത്തെത്തിയിരുന്നു.