സണ്ണി വെയ്നെയും ലുക്മാനെയും പ്രധാന കഥാപാത്രങ്ങളാക്കി നവാസ് സുലൈമാൻ തിരക്കഥയെഴുതി സംവിധാനം ചെയ്യുന്ന ‘ടർക്കിഷ് തർക്ക’ത്തിന്റെ ഫസ്റ്റ് ലുക്ക് പോസ്റ്റർ പുറത്തിറക്കി അണിയറപ്രവർത്തകർ.
കഴിഞ്ഞ ദിവസങ്ങളിൽ ലുക്മാനും സണ്ണി വെയ്നും തമ്മിൽ അടിയുണ്ടാക്കുന്ന 36 സെക്കന്റുള്ള ഒരു വീഡിയോ സോഷ്യൽ മീഡിയയിൽ വൈറലായിരുന്നു. കൂടെയുള്ളവർ പിടിച്ചു വെച്ചിട്ടും അടിയുണ്ടാക്കാൻ നിൽക്കുന്ന താരങ്ങളാണ് വീഡിയോയിലുള്ളത്.
താരങ്ങൾ തമ്മിൽ ഈഗോ പ്രശ്നങ്ങളാണ് അടിക്ക് കാരണമെന്നും, എന്നാൽ അതൊന്നുമല്ല പുതിയ സിനിമയുടെ പ്രൊമോഷൻ ആണിതെന്നുമുള്ള ഒരുപാട് ചർച്ചകൾ അതിനെത്തുടർന്ന് ഉണ്ടായിരുന്നു. പുതിയ സിനിമയുടെ പ്രഖ്യാപനം വന്നതോട് കൂടി അത്തരം ചർച്ചകളെല്ലാം അവസാനിച്ചിരിക്കുകയാണ് ഇപ്പോൾ.
നാദിർ ഖാലിദും, അഡ്വ. പ്രദീപ് കുമാറും ചേർന്ന് ബിഗ് പിക്ചേഴ്സിന്റെ ബാനറിലാണ് ചിത്രം നിർമ്മിക്കുന്നത്. വിനായക് ശശികുമാറിന്റെ വരികൾക്ക് ബി. കെ ഹരിനാരായണനാണ് ചിത്രത്തിന് സംഗീതം നിർവഹിക്കുന്നത്. ചിത്രം ഈ വർഷം നവംബറിൽ റിലീസ് ചെയ്യും.
