'ഗജനി'ക്ക് സീക്വല്‍? സൂര്യയും മുരുഗദോസും വീണ്ടും ഒന്നിക്കുന്നു

സൂര്യയും സംവിധായകന്‍ എ.ആര്‍ മുരുഗദോസും വീണ്ടും ഒന്നിക്കുന്നു. സൂര്യയുടെ കരിയര്‍ ബ്രേക്ക് ആയി മാറിയ ‘ഗജിനി’യുടെ സീക്വല്‍ ഒരുങ്ങുനനതായാണ് റിപ്പോര്‍ട്ടുകള്‍. മുരുഗദോസ് ഗജിനിയുടെ രണ്ടാം ഭാഗവുമായി ബന്ധപ്പെട്ട് നടനുമായി ചര്‍ച്ചകള്‍ നടത്തിയെന്നും അന്തിമ തീരുമാനങ്ങള്‍ ഉടന്‍ ഉണ്ടാകും എന്നുമാണ് റിപ്പോര്‍ട്ടുകള്‍.

ഇത് മൂന്നാം തവണയാണ് മുരുഗദോസും സൂര്യയും ഒന്നിക്കുന്നത്. ഗജിനിക്ക് ശേഷം ‘ഏഴാം അറിവ്’ എന്ന സിനിമയ്ക്കായി ഇരുവരും ഒന്നിച്ചിരുന്നു. അസിനും നയന്‍താരയുമായിരുന്നു ഗജിനിയിലെ നായികമാര്‍. രണ്ടാം ഭാഗം വരുമ്പോള്‍ നയന്‍താര സിനിമയുടെ ഭാഗമാകുമോ എന്നാണ് ആരാധകരുടെ ചോദ്യങ്ങള്‍.

സഞ്ജയ് രാമസ്വാമി എന്ന കഥാപാത്രമായാണ് സൂര്യ ചിത്രത്തിലെത്തിയത്. ആര്‍. മാധവന്‍, അജിത്ത് എന്നിവര്‍ വേണ്ടെന്ന് വച്ച ചിത്രത്തില്‍ അപ്രതീക്ഷിതമായാണ് സൂര്യ എത്തിയത്. ഗജിനി എന്ന പേരില്‍ തന്നെ ചിത്രത്തിന്റെ ഹിന്ദി പതിപ്പും എത്തിയിരുന്നു. ആമിര്‍ ഖാന്‍ ആണ് ചിത്രത്തില്‍ നായകാനായത്.

അതേസമയം, മൂന്ന് സിനിമകളാണ് സൂര്യയുടെതായി ഒരുങ്ങുന്നത്. ബാല സംവിധാനം ചെയ്യുന്ന വണങ്കന്‍ ചിത്രത്തിന്റെ ഷൂട്ടിംഗ് കന്യാകുമാരിയിലും ഗോവയിലുമായാണ് നടക്കുന്നത്. സൂര്യയുടെ 41ാം സിനിമയാണിത്. കൃതി ഷെട്ടി നായികയാകുന്ന ചിത്രത്തില്‍ മലയാള താരം മമിത ബൈജും വേഷമിടും.