ദളപതിയുടെ മകന്‍ ജേസണ്‍ സഞ്ജയ്‌യുടെ സിനിമാ അരങ്ങേറ്റത്തെ കുറിച്ചുള്ള വാര്‍ത്തകള്‍ നാളുകളായി പ്രചരിക്കാന്‍ ആരംഭിച്ചിട്ട്. ദുല്‍ഖര്‍ സല്‍മാന്‍ ആകും ചിത്രത്തിലെ നായകന്‍ എന്നാണ് റിപ്പോര്‍ട്ടുകള്‍ എത്തിയത്. വിജയ് സേതുപതി, ധ്രുവ് വിക്രം എന്നിവരും ചിത്രത്തില്‍അഭിനയിക്കുമെന്നും വാര്‍ത്തകള്‍ എത്തിയിരുന്നു.
ഈ താരങ്ങള്‍ക്കൊപ്പം തന്നെ ഉയര്‍ന്നു കേട്ട പേരാണ് ശിവകാര്‍ത്തികേയന്റേത്. ഈ ചിത്രത്തിലെ മറ്റൊരു പ്രധാന താരം ശിവകാര്‍ത്തികേയന്‍ ആയിരിക്കും എന്നാണ് റിപ്പോര്‍ട്ടുകള്‍. എന്നാല്‍ ചിത്രത്തെ കുറിച്ച് ഇപ്പോള്‍ എത്തുന്ന വാര്‍ത്തകള്‍ അത്ര ശുഭകരമല്ല. ശിവകാര്‍ത്തികേയന്‍ ഈ സിനിമയില്‍ അഭിനയിക്കാന്‍ വിസമ്മതിച്ചു എന്നാണ് പുതിയ റിപ്പോര്‍ട്ടുകള്‍.
ചിത്രത്തിന്റെ കഥയില്‍ തന്റെ താരമൂല്യത്തിന് വേണ്ട രീതിയില്‍ കാര്യങ്ങള്‍ ഇല്ലെന്ന് പറഞ്ഞാണ് കഥ കേട്ട ശേഷം ശിവകാര്‍ത്തികേയന്‍ ജെയ്സണ്‍ സഞ്ജയ് ചിത്രം ഉപേക്ഷിച്ചത് എന്നാണ് കോളിവുഡ് വൃത്തങ്ങളെ അധികരിച്ച് തമിഴ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.
അതേസമയം, ചിത്രത്തിലെ അഭിനേതാക്കളുടെയും സാങ്കേതിക വിദഗ്ധരുടെയും വിവരങ്ങള്‍ ഉടന്‍ പുറത്തുവിടുമെന്നാണ് പ്രതീക്ഷിക്കുന്നത്. കഴിഞ്ഞ വര്‍ഷം ആഗസ്റ്റ് 28നാണ് ജെയ്സണ്‍ സഞ്ജയ് സംവിധാന രംഗത്തേക്ക് വരുന്നു എന്ന പ്രഖ്യാപനം നടത്തിയത്. ലൈക്ക പ്രൊഡക്ഷനാണ് നിര്‍മ്മാതാക്കള്‍.
സംവിധായകന്‍ ശങ്കറിന്റെ മകള്‍ അതിഥി ശങ്കറും ജേസണ്‍ സംവിധാനം ചെയ്യുന്ന ചിത്രത്തില്‍ പ്രധാന റോളില്‍ എത്തുമെന്നാണ് സൂചന. യുവന്‍ ശങ്കര്‍ രാജയാണ് ചിത്രത്തിന്റെ സംഗീതം എന്ന് റിപ്പോര്‍ട്ടുകള്‍ വന്നെങ്കിലും എ.ആര്‍ റഹ്‌മാന്റെ മകന്‍ എ.ആര്‍ അമിന്‍ ആണ് സംഗീത സംവിധായകനാവുക എന്നും വാര്‍ത്തകളുണ്ട്.
