കാന്താര 2നായുള്ള കാത്തിരിപ്പിലാണ് ആരാധകര്‍. ഇപ്പോഴിതാ സിനിമയെക്കുറിച്ച് ഒരു അപ്‌ഡേറ്റ് പുറത്തുവന്നിരിക്കുകയാണ്. കാന്താര 2ല്‍ തമിഴ് സൂപ്പര്‍സ്റ്റാര്‍ രജനികാന്തും ഭാഗമായേക്കും എന്നാണ് വിവരം. സംവിധായകന്‍ തന്നെയാണ് ബെംഗളൂരുവില്‍ നടന്ന ഒരു ചടങ്ങില്‍ ഇത് സംബന്ധിച്ച സൂചനകള്‍ നല്‍കിയത്.
സിനിമയുടെ തിരക്കഥയുമായി ബന്ധപ്പെട്ടുള്ള ഗവേഷണങ്ങളും പ്രാഥമിക ജോലികളും നടന്നു വരികയാണ്. നിരവധി സര്‍പ്രൈസുകള്‍ ചിത്രത്തിലുണ്ടാകുമെന്നും റിഷബ് ഷെട്ടി പറഞ്ഞു. ചിത്രം പ്രേക്ഷകര്‍ക്ക് വ്യത്യസ്ത അനുഭവമായിരിക്കുമെന്നും അദ്ദേഹം കൂട്ടിച്ചേര്‍ത്തു.
കാന്താരയുടെ വിജയത്തിന് പിന്നാലെ രജനിയെ ചെന്നൈയിലെ വീട്ടിലെത്തി റിഷബ് സന്ദര്‍ശിച്ചിരുന്നു. ചിത്രം കണ്ടതിന് ശേഷം കാന്താര ടീമിനെ പ്രശംസിച്ച് രജനികാന്തും രംഗത്ത് വന്നു.
നിര്‍മ്മാതാവ് വിജയ് കിരഗണ്ഡൂര്‍ ആണ് രണ്ടാം ഭാഗത്തെ സംബന്ധിച്ച സൂചന ആദ്യം നല്‍കുന്നത്. രണ്ടാം ഭാഗം സീക്വല്‍ ആയിരിക്കില്ലെന്നും ‘പഞ്ചുരുളി ദൈവയുടെ കഥ’ പറയുന്ന പ്രീക്വലാകുമെന്നും അദ്ദേഹം പറഞ്ഞു.
Read more
2024 ഏപ്രിലില്‍-മെയ് മാസത്തില്‍ ഒരു പാന്‍ ഇന്ത്യന്‍ റിലീസായി കാന്താര പ്രീക്വല്‍ ആലോചിക്കുന്നുവെന്നും പുതിയ ചില കഥാപാത്രങ്ങളും കൂടി അണിചേരുമെന്നും വിജയ് കിരഗണ്ഡൂര്‍ കൂട്ടിച്ചേര്‍ത്തു.
