തെലുങ്ക് സിനിമയില്‍ ഒരുപാട് ആരാധകരുള്ള താരങ്ങളാണ് നന്ദമൂരി ബാലകൃഷ്ണയും പവന്‍ കല്യാണും. ഇരുവരും ഒന്നിച്ച് ഒരു വേദിയില്‍ എത്തിയ വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വൈറല്‍. ബാലയ്യ അവതരിപ്പിക്കുന്ന ‘അണ്‍സ്റ്റോപ്പബിള്‍ എന്‍ബികെ’ എന്ന പരിപാടിയിലാണ് പവന്‍ കല്യാണ്‍ എത്തിയിരിക്കുന്നത്.
ഈ ഷോയുടെ പ്രമോ വീഡിയോയാണ് ഇപ്പോള്‍ വൈറലാകുന്നത്. ഇത്രയധികം വിപ്ലവ ചിന്തകളുള്ള ഒരാള്‍ എങ്ങനെ പവര്‍ സ്റ്റാറായി എന്ന് ബാലകൃഷ്ണ പവനോട് ചോദിക്കുന്നതായും പ്രമോയില്‍ ഉണ്ട്. പവന്റെ രാഷ്ട്രീയവുമായി ബന്ധപ്പെട്ടാണ് ഈ ചോദ്യം. പവര്‍ സ്റ്റാര്‍ എന്ന് അറിയപ്പെടുന്ന പവന്‍ കല്യാണ്‍, മെഗാസ്റ്റാര്‍ ചിരഞ്ജീവിയുടെ സഹോദരനാണ്.
മാത്രവുമല്ല ജന സേന പാര്‍ട്ടി എന്ന സ്വന്തം രാഷ്ട്രീയ പാര്‍ട്ടിയും നടന്‍ സ്ഥാപിച്ചിട്ടുണ്ട്. തെലുങ്ക് ദേശം പാര്‍ട്ടി സ്ഥാപകന്‍ എന്‍ടിആറിന്റെ മകനായ ബാലകൃഷ്ണയും രാഷ്ട്രീയത്തില്‍ സജീവമാണ്. അതിനാല്‍ തന്നെ തെലുങ്കിലെ മറ്റൊരു പ്രധാനപ്പെട്ട താരമായ ബാലകൃഷ്ണയുടെ ടോക്ക് ഷോയില്‍ പവന്‍ എത്തുന്നത് വലിയ വാര്‍ത്തായിരുന്നു.
ആന്ധ്രയിലെ പുതിയ രാഷ്ട്രീയ ധാരയുടെ വക്താവായ പവനുമായുള്ള ബാലയ്യയുടെ രാഷ്ട്രീയ കാര്യത്തിലെ സംസാരം ചിലപ്പോള്‍ തീപാറിയേക്കും എന്നാണ് ആരാധകര്‍ പ്രതീക്ഷിക്കുന്നത്. ഇത് കൂടാതെ ചിരഞ്ജീവിയുടെ റിവോള്‍വര്‍ സ്വന്തം തലയില്‍ വച്ചതിനെ കുറിച്ചും പവന്‍ ഷോയില്‍ വിവരിക്കുന്നുണ്ട്.
Read more
എന്നാല്‍ ഈ കഥ പൂര്‍ണ്ണമായും പ്രമോയില്‍ കാണിച്ചിട്ടില്ല. അതുകൊണ്ട് തന്നെ അത് എന്താണ് എന്നതാണ് ഇപ്പോള്‍ തെലുങ്ക് സിനിമ രംഗത്തെ ചര്‍ച്ച. അതേസമയം, ‘വീരസിംഹ റെഡ്ഡി’ ആണ് ബാലയ്യയുടെതായി ഒടുവില്‍ പുറത്തിറങ്ങിയ ചിത്രം. റിലീസ് ചെയ്ത് രണ്ട് ദിവസങ്ങള്‍ക്കുള്ളില്‍ തന്നെ ചിത്രം 100 കോടി ക്ലബ്ബില്‍ കയറിയിരുന്നു.
