പുതിയ സിനിമയായ ‘ദസറ’യുടെ പ്രമോഷന്‍ പരിപാടികളുമായി തിരക്കിലാണ് നടന്‍ നാനി ഇപ്പോള്‍. മാര്‍ച്ച് 30ന് ആണ് ചിത്രം റിലീസിന് ഒരുങ്ങുന്നത്. ടഫ് ലുക്കിലാണ് നാനി ചിത്രത്തില്‍ വേഷമിടുന്നത്. ധരണി എന്ന കഥാപാത്രത്തെയാണ് ചിത്രത്തില്‍ താരം അവചരിപ്പിക്കുന്നത്. കഥാപാത്രത്തിന്റെ ലുക്ക് സോഷ്യല്‍ മീഡിയയില്‍ ചര്‍ച്ചയാവുകയും ചെയ്തിരുന്നു.
‘പുഷ്പ’ സിനിമയിലെ അല്ലു അര്‍ജുനുമായും ‘കെജിഎഫ്’ ചിത്രത്തിലെ യാഷുമായും നാനിയുടെ കഥാപാത്രത്തിനുള്ള സാമ്യമാണ് ഇപ്പോള്‍ ചര്‍ച്ചയാകുന്നത്. പുഷ്പയും കെജിഎഫുമായുള്ള സാമ്യത്തെ കുറിച്ചുള്ള ചോദ്യത്തോട് പ്രതികരിച്ചിരിക്കുകയാണ് നാനി ഇപ്പോള്‍.
ഏത് ഗ്രാമീണ കഥ ആയാലും രൂപവും ഗെറ്റപ്പും എപ്പോഴും ഒരുപോലെ ആയിരിക്കും. നിങ്ങള്‍ 30 വരെ കാത്തിരിക്കുകയാണെങ്കില്‍ ഇത്തരമൊരു താരതമ്യത്തെ കുറിച്ചുള്ള ചോദ്യം വരില്ല എന്നാണ് നാനി മറുപടി പറഞ്ഞിരിക്കുന്നത്. മുംബൈയില്‍ നടന്ന ഒരു പ്രമോഷന്‍ പരിപാടിക്കിടെയാണ് താരം സംസാരിച്ചത്.
ഒഡേല ശ്രീകാന്താണ് ദസറയുടെ സംവിധാനം. കീര്‍ത്തി സുരേഷ് ആണ് ചിത്രത്തില്‍ നായിക. ഷൈന്‍ ടോം ചാക്കോ, സായ് കുമാര്‍ എന്നിവരും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. തെലങ്കാനയിലെ ഗോദാവരിക്കാനിക്ക് സമീപമുള്ള സിംഗരേണി കല്‍ക്കരി ഖനികളുടെ പശ്ചാത്തലത്തിലാണ് ദസറ ഒരുക്കിയിരിക്കുന്നത്.
Read more
അതേസമയം, ചിത്രത്തില്‍ പ്രവര്‍ത്തിച്ച 130 ഓളം അണിയറപ്രവര്‍ത്തകര്‍ക്ക് കീര്‍ത്തി സ്വര്‍ണ നാണയം സമ്മാനം നല്‍കിയിരുന്നു. 75 ലക്ഷത്തോളം രൂപയാണ് കീര്‍ത്തി സുരേഷ് ഇതിനായി ചെലവഴിച്ചത്. ‘വെന്നെല’ എന്ന കഥാപാത്രമായിട്ടാണ് കീര്‍ത്തി ചിത്രത്തില്‍ വേഷമിടുന്നത്.
