സംവിധാകന്‍ എം.എ നിഷാദ് വീണ്ടും അഭിനേതാവാകുന്നു. കെ സന്തോഷ് സംവിധാനം ചെയ്യുന്ന ചിത്രത്തില്‍ ഇര്‍ഷാദ് അലിക്കൊപ്പം ഒരു പ്രധാനപ്പെട്ട റോളിലാണ് എം.എ നിഷാദ് വേഷമിടുക. മാനുവല്‍ ക്രൂസ് ഡാര്‍വിന്‍ നിര്‍മ്മിക്കുന്ന ചിത്രത്തിന്റെ ടൈറ്റില്‍ പോസ്റ്റര്‍ നാളെ റിലീസ് ചെയ്യും. എം.എ നിഷാദ് തന്നെയാണ് ഇക്കാര്യം ഫെയ്‌സ്ബുക്കിലൂടെ പങ്കുവച്ചത്.
മലയാളത്തിലെ പ്രമുഖ സംവിധായകരായ സിദ്ദിഖ്, രഞ്ജിത്ത്, ബി ഉണ്ണികൃഷണന്‍, സുരേഷ് ഉണ്ണിത്താന്‍, ജീത്തു ജോസഫ്, മഹേഷ് നാരായണന്‍, രഞ്ജിത്ത് ശങ്കര്‍, പ്രിയാനന്ദന്‍, അജയ് വാസുദേവ്, ജൂഡ് ആന്തണി, മിഥുന്‍ മാനുവല്‍ തോമസ്, ഒമര്‍ ലുലു, സോഹന്‍ സീനുലാല്‍, ദീപു അന്തിക്കാട്, രജേഷ് നായര്‍ എന്നിവരുടെ പേജുകളിലൂടെ ടൈറ്റില്‍ ലോഞ്ച് ചെയ്യും.
എം.എ നിഷാദിന്റെ കുറിപ്പ്:
സിനിമാ രംഗത്തെത്തിയിട്ട് ഏതാനും വര്‍ഷങ്ങളായി. ഒരു നിര്‍മ്മാതാവിന്റെ വേഷം ധരിച്ചു, സംവിധായകന്റെ തൊപ്പി അണിഞ്ഞു, തിരക്കഥാകൃത്ത് ആയി. ഒരു നടനെന്ന നിലയില്‍ കുറച്ച് സിനിമകളില്‍ അഭിനയിക്കാനുള്ള അവസരവും എനിക്ക് ലഭിച്ചിട്ടുണ്ട്. ഇര്‍ഷാദ് അലിക്കൊപ്പം ഇപ്പോള്‍ വളരെ പ്രധാനപ്പെട്ട ഒരു കഥാപാത്രം ചെയ്യുകയാണ്.
ഈ കഥാപാത്രത്തെ അവതരിപ്പിക്കാന്‍ ഞാന്‍ തീരുമാനിച്ചത് വലിയ പ്രതീക്ഷകളോടെയാണ്, ഈ അവസരത്തിനായി എന്റെ സംവിധായകന്‍ കെ സതീഷിനും നിര്‍മ്മാതാവ് മാനുവല്‍ ക്രൂസ് ഡാര്‍വിനും നന്ദി പറയാന്‍ ഞാന്‍ ആഗ്രഹിക്കുന്നു. എന്റെ പ്രിയപ്പെട്ട സംവിധായക സുഹൃത്തുക്കള്‍ ഈ സിനിമയുടെ ടൈറ്റില്‍ നാളെ ലോഞ്ച് ചെയ്യും.
