ഇന്ദ്രന്‍സിനെ കേന്ദ്ര കഥാപാത്രമാക്കി റോജിന്‍ തോമസ് സംവിധാനം ചെയ്യുന്ന ‘ഹാഷ് ഹോം’ ചിത്രം ആമസോണ്‍ പ്രൈമില്‍ റിലീസ് ചെയ്യുന്നു. ചിത്രത്തിന്റെ നിര്‍മ്മാതാവ് വിജയ് ബാബു ആണ് ഇക്കാര്യം സോഷ്യല്‍ മീഡിയയിലൂടെ വ്യക്തമാക്കിയത്. ഓഗസ്റ്റ് 19ന് ചിത്രം റിലീസ് ചെയ്യും.
സാധാരണക്കാരനായ ഒരു അച്ഛന്റെ റോളിലാണ് ഇന്ദ്രന്‍സ് ചിത്രത്തില്‍ വേഷമിടുന്നത്. ശ്രീനാഥ് ഭാസി, തണ്ണീര്‍ മത്തന്‍ ഫെയിം നസ്ലിന്‍ എന്നിവരാണ് ഇന്ദ്രന്‍സിന്റെ മക്കളായി ചിത്രത്തില്‍ എത്തുന്നത്. മഞ്ജു പിള്ള ഭാര്യയായും അഭിനയിക്കുന്നു.
വിജയ് ബാബു, ജോണി ആന്റണി, മണിയന്‍പിള്ള രാജു, ശ്രീകാന്ത് മുരളി, ദീപ തോമസ്, കെപിഎസി ലളിത, അനൂപ് മേനോന്‍, പ്രിയങ്ക നായര്‍ എന്നിവരാണ് ചിത്രത്തിലെ മറ്റ് അഭിനേതാക്കള്‍. ഫ്രൈഡേ ഫിലിം ഹൗസിന്റെ ബാനറില്‍ വിജയ് ബാബു ആണ് ചിത്രം നിര്‍മ്മിക്കുന്നത്.
നീല്‍ ഡി. ഛായാഗ്രഹണവും പ്രജിഷ് പ്രകാശ് എഡിറ്റിംഗും നിര്‍വ്വഹിക്കുന്നു. അരുണ്‍ അലത്, ശ്യാം മുരളീധരന്‍, മമത സീമന്ത് എന്നിവര്‍ രചിക്കുന്ന ഗാനങ്ങള്‍ക്ക് രാഹുല്‍ സുബ്രഹ്‌മണ്യന്‍ സംഗീതം ഒരുക്കുന്നു. വിനീത് ശ്രീനിവാസന്‍ ആണ് ഗാനങ്ങള്‍ ആലപിക്കുന്നത്.
